AQSh tatýlyqqa umtylady - Donald Tramp
NUR-SULTAN. QazAqparat – Búgin AQSh prezıdenti Donald Tramp Iraktaǵy amerıkalyq áskerı bazalardyń atqylanýyna baılanysty halyqqa úndeý joldady, dep habarlaıdy QazAqparat.
Donald Tramp óziniń 9 mınýttyq joldaýynda raketa shabýylynan AQSh áskerıleri zardap shekpegenin atap ótti. Soǵan qaramastan Amerıka Qurama Shtattary Iranǵa qarsy jańa qatań sanktsııalar engizedi.
Tegeran ıadrolyq ambıtsııalarynan bas tartyp, terrorızmge qoldaý jasaǵandy doǵarýy tıis, dep málimdedi AQSh kóshbasshysy.
«Iran halqy men basshylyǵyna mynany aıtqym keledi: Biz sizderdiń bolashaǵyńyz jarqyn bolǵanyn qalaımyz. Sizder oǵan laıyqsyzdar. Memleket órkendep, álem elderimen úılesimdi dostyq qarym-qatynasta bolsa deımiz. Amerıka Qurama Shtattary beıbitshilikke umtylǵan árbir elmen tatý bolǵysy keledi», - dep qorytyndylady sózin D. Tramp.
Donald Tramp sóziniń sońynda Irandy «ortaq maqsattar jolynda» yntymaqtasyp, DAISh terrorıstik uıymyna qarsy birge kúresýge shaqyrdy. Onyń sózinshe, Iranmen jańa ıadrolyq kelisim jasaý kerek, al Reseı men Eýropa qazirgi kelisimnen bas tartýy tıis.
AQSh sonymen birge NATO-nyń Taıaý Shyǵysta áldeqaıda belsendi ról oınaýyn ótindi.
Eske sala keteıik, búgin Iran AQSh-tyń Iraktaǵy eki áskerı bazasyn zymyranmen atqylaǵan bolatyn.
