AQSh tarıhynda alǵash ret barlyq shtatta tótenshe jaǵdaı rejımi jarııalandy
AQSh-ta alǵash ret barlyq shtatta bir mezgilde qoldanylatyn tótenshe jaǵdaı rejımin engizý federaldy jáne jergilikti deńgeıde memlekettik qarjylandyrýǵa qol jetimdilikti jeńildetýge múmkindik beredi.
Prezıdent Donald Tramp 11 sáýirde koronavırýs pandemııasyna baılanysty AQSh-tyń batysyndaǵy Ýaıomıng (Wyoming) shtatynda «aýqymdy apat» rejımin engizý týraly deklaratsııany jarııalady. Osylaısha, bul jaǵdaı el tarıhynda alǵash ret barlyq 50 shtatqa jáne Kolýmbııa federaldy okrýgyna qoldanylady.
«Prezıdent barlyq amerıkalyqtardyń densaýlyǵyn qorǵaýǵa qatysty gýbernatorlardyń ótinishterine jaýap berýdi jalǵastyrýda», - dep atap ótti Aq úıdiń baspasóz hatshysynyń orynbasary Djýd Dır.
Ýaıomıng gýbernatory Mark Gorodon Trampqa 9 sáýirde tıisti ótinish joldaǵan. Ol kezde shtatta 200-den astam koronavırýs ınfektsııasy tirkelgen.
«Ýaıomıng keıbir basqa shtattar sııaqty qıyn jaǵdaıǵa áli tap bolǵan joq, biraq bul deklaratsııa bizge qajet kezde resýrstardy daıyndaýǵa jáne jumyldyrýǵa kómektesedi», - dedi Gordon.
Aq úı tótenshe jaǵdaı federaldy jáne jergilikti deńgeıde, sondaı-aq birqatar uıymǵa qatysty memlekettik qarjylandyrýǵa qol jetimdilikti jeńildetýge múmkindik beretinin atap ótti.
Baltımor shtatyndaǵy Djon Hopkıns atyndaǵy ýnıversıtettiń málimeti boıynsha, 12 sáýirde elde SARS-CoV-2 ınfektsııasyn juqtyrǵan 529 951 jaǵdaı tirkelgen. 20 608 adam vırýstan qaıtys bolǵan. 32 091 adam saýyǵyp shyqqan. Al AQSh qazir álemde pandemııadan qaıtys bolǵandar sany boıynsha aldyńǵy orynda.
