AQSh-tan poshta arqyly Almaty áýejaıyna esirtki jiberilgen
ALMATY. QazAqparat - Almatynyń Halyqaralyq áýejaıynda AQSh-tan poshtamen jiberilgen esirtki zattary anyqtaldy, dep habarlaıdy QazAqparat Almaty qalasy boıynsha Memlekettik kirister departamentine silteme jasap.
2018 jyldyń 25 maýsymy kúni departamenttiń «Jetisý» keden beketiniń qyzmetkerleri Halyqaralyq áýejaıda AQSh-tan joldanǵan poshta jóneltilimine nazar aýdarǵan. Ol bıylǵy 18 maýsymda azamat N.-nyń atyna jiberilgen.
Ekspress-júkke arnaıy tehnıkalyq quralmen kedendik baqylaý júrgizý barysynda odan jalpy salmaǵy 0,7 kelini quraıtyn zat tabyldy.
Anyqtalǵan zat ósimdik tektes, túsi jasyl jáne ózindik ıisi bar.
«Saraptamanyń qorytyndysy boıynsha olardyń «gashısh» jáne «marıhýana» ekeni anyqtaldy», - delingen ІІD habarlamasynda.
