AQSh-tan óz erkimen qaıtatyn qazaqstandyqtar 1000 AQSh dollaryn qalaı alady

ASTANA. KAZINFORM — Amerıka Qurama Shtattaryndaǵy Qazaqstan Respýblıkasynyń elshiligi AQSh-ta zańsyz júrgen qazaqstandyqtarǵa úndeý joldady.

— AQSh Іshki qaýipsizdik mınıstrligi elde zańsyz júrgen azamattar úshin óz erkimen qaıtýǵa múmkindik beretin jańa baǵdarlama qabyldaǵanyna nazar aýdaramyz. Atalǵan baǵdarlama aıasynda óz erkimen qaıtam deýshilerge qaıtý bıleti tolyq tólenip, elge jetken soń 1000 AQSh dollary kóleminde qarjy bólý qarastyrylǵan, — dep túsindirdi elshilik.

Vedomstvo málim etkendeı, ol úshin CBP Home mobıldi qosymshasy arqyly ótinish berý qajet.

AQSh Іshki qaýipsizdik mınıstri Krıstı Noem bul baǵdarlamaǵa qatysty: «Qamaýǵa alynýdan jáne basqa da qarjylyq saldarlardan aýlaq bolýdyń eń qaýipsiz, rettelgen ári únemdi joly» degen pikir bildirdi.

— Elshilik AQSh-ta ár-túrli sebeptermen mártebesiz, zańsyz qalyp qoıǵan QR azamattaryna osy múmkindikti muqııat qarastyrýǵa shaqyrady. Sol arqyly zańsyz mıgranttarǵa qoldanylatyn sharalardyń aldyn alýǵa, máseleni zańdy túrde sheshýge jáne bolashaqta elge oralý quqyǵyn saqtaý úshin mańyzdy qadam bolmaq, — dep atap ótti AQSh-taǵy Qazaqstan elshiligi.

Osyǵan deıin AQSh ózdiginen deportatsııalanatyn zańsyz sheteldikterge 1000 dollar tóleıdi degen aqparat taraǵan bolatyn.