AQSh-tan kelgen maman qaraǵandylyq ustazdarǵa kýrs ótkizdi
QARAǴANDY. QazAqparat - Qaraǵandylyq muǵalimder eń jańa zerthanalyq jabdyqtarmen jumys jasaýdy úırendi. Zamanaýı qurylǵylardy paıdalaný kýrsyn AQSh-tan kelgen maman ótkizdi, dep habarlaıdy QazAqparat tilshisi.
Hımııa, fızıka jáne bıologııa pánderiniń muǵalimderi sheteldik mamannan úırengen bilimin tájirıbe júzinde qoldanyp, oqýshylarmen birge ǵylymı zerttemeler men synaqtar ótkizetin bolady. Bul óz kezeginde dáristerdi anaǵurlym qyzyǵyraq etýge septigin tıgizedi.
«Qaraǵandylyq mektepterge fızıka, hımııa jáne bıologııa pánderiniń sabaqtary úshin ınteraktıvti zerthanalar satyp alyndy. Qazirgi tańda ondaı zerthanalar júzden astam oqý ordasynda ornatylǵan. Endi ol jabdyqtardy qoldana alý úshin pedagogtardy oqytý máselesi kóterildi. Kazdidac qaýymdastyǵy jáne «Bazısnyı magazın» kompanııasymen birlese otyryp, biz muǵalimderge arnalǵan kýrs uıymdastyrdyq. Ol úshin AQSh-tan datchık óndiretin kompanııany tanystyratyn ternerdi arnaıy shaqyrttyq», - deıdi Qaraǵandy oblysynyń bilim berýdi damytý oqý-ádistemelik ortalyǵynyń dırektory Esbol Arynov.
Kýrsty tyńdaýǵa oblystyń birneshe qalasy men aýdandaryndaǵy 10 mekteptiń muǵalimderi jınaldy. Jattyqtyrýshynyń jetekshiligimen olar túrli datchıkterdiń jumysyn meńgerdi: magnıt kúshterin, dybystyq tolqyndardy, júrek yrǵaqtaryn, ósimdikter fotosıntezin ólshedi jáne basqa zertteýlerdi ótkizýde tájirıbe jınaqtady.
«Meniń mindetim - muǵalimderge ǵylymı zerthanada zamanaýı tehnologııalardy qoldanýdy úıretý boldy. Bul - oqý protsesine engiziletin jańa jabdyqtar. Ony paıdalaný aıasy tek fızıka, hımııa nemese bıologııa sııaqty pándermen ǵana shektelip qalmaı, odan da keń aýqymdy qamtıdy. Mysaly, ol fızıologııa nemese jer týraly ǵylym bolýy da múmkin. Bul datchıkterdiń artyqshylyǵy - muǵalimge de, oqýshyǵa da az ýaqyt ishinde úlken jumys atqarýǵa múmkindik beredi. Kóp jazýdyń qajeti joq - kompıýter ózi barlyq derekterdi jınaıdy, tirkeıdi, olardyń kestesin jasaıdy. Jabdyqtar paıdalanýshylar úshin qarapaıym, onymen 14 jastan joǵary oqýshylar jumys isteı alady» , - dep túsindirdi trener Djerard Ezkýrra.
Amerıkandyq mamannyń aıtýynsha, tyńdaýshylar barlyǵyn jyldam meńgerip otyrǵan. Sheteldik oqytýshyǵa jergilikti muǵalimderdiń óz oqýshylarynyń ıgiligi úshin jańa bilimge degen umtylysy qatty unaǵan eken.
«Men bıologııa páninen sabaq beremin. Bul kýrs óte qajet jáne paıdaly. Bilimniń jetispeýinen biz bul jabdyqty qalaı paıdalaný kerektigin bilmedik. Endi zerthanalyq jumystardy ártúrli zertteýlermen toltyra alamyz. Jattyqtyrýshy bizge barlyǵyn óte qyzyqty etip kórsetti. Mysaly, fotosıntez boıynsha tájirıbe júrgizip, ósimdikti túrli jaryqta kolbaǵa ornalastyra otyryp zertteýler jasadyq», - deıdi Qaraǵandy qalasy №79 orta mektebiniń muǵalimi Lázzat Kóbenova.
Sonymen qatar, muǵalimder shet tiliniń mamanymen tájirıbe almasty. Sebebi oqytýshy sabaqty aǵylshyn tilinde ótkizdi.
4 kúndik kýrs aıaqtalǵannan keıin tyńdaýshylarǵa sertıfıkattar tabys etildi. Bul olarǵa keleshekte áriptesterin oqytý úshin trener bolýǵa múmkindik beredi.
