AQSh-tan gýmanıtarlyq kómek retinde Pfizer vaktsınasyn jetkizý qaralyp jatyr - mınıstrlik

ASTANA. QazAqparat – Búginde elimizde koronavırýsqa qarsy 570 myń doza vaktsına bar. Odan bólek, qazirgi ýaqytta AQSh-tan balalarǵa arnalǵan Pfizer vaktsınasyn jetkizý jaǵy pysyqtalyp jatyr. Atalǵan derekti QR DSM sanıtarııalyq-epıdemıologııalyq baqylaý komıteti tóraǵasynyń orynbasary Maral Raqymjanova keltirdi, dep habarlaıdy QazAqparat tilshisi.

«Bizdiń vedomstvoǵa Pfizer vaktsınasyn elimizdiń syrtqy ister mınıstrligi arqyly gýmanıtarlyq kómek retinde berý múmkindigi týraly usynys tústi. Vaktsına 5 pen 11 jas aralyǵyndaǵy balalarǵa arnalǵan. Qazir atalǵan usynys pysyqtalyp, vaktsınany qabyldaý múmkindigi talqylanyp jatyr. Elimizde balalarǵa arnalǵan Pfizer vaktsınasy bitip qalǵan. Aıta ketsek, atalǵan ekpe 12 jastan joǵary jasóspirimderge salynady», - dedi Maral Raqymjanova ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, AQSh-tan gýmanıtarlyq kómek retinde jetkizilýi múmkin Pfizer vaktsınasyyń kólemi belgisiz. Sebebi, másele qaralyp jatyr.

«Qazirgi tańda elimizde shamamen 570 myń doza vaktsına bar. Onyń ishinde QazVac 225 myń jáne Sinopharm 345 myń doza. Eresekter úshin Pfizer vaktsınasy joq», - deıdi ol.

Eske sala ketsek, qazan aıynyń ortasynda elimizdiń densaýlyq saqtaý mınıstrligi 11 mıllıonǵa jýyq qazaqstandyqtyń koronavırýsqa qarsy ekpe alǵany týraly habarlaǵan edi.