AQSh-tan asyp túsý nemese onyń ornyn basý oıymyzda joq - Sı Tszınpın
Výdsaıd qalasynda AQSh pen QHR delegatsııalary arasynda jabyq esik jaǵdaıynda ótken tórt saǵattyq kelissózde Djo Baıden men Sı Tszınpın qandaı máselelerdi talqylaǵany belgili boldy, dep habarlaıdy Kazinform agenttiginiń menshikti tilshisi.
Taraptar negizgi máselelerdiń biri – áskerı vedomstvolar arasyndaǵy baılanysty jańǵyrtý boıynsha kelisimge keldi. Bul mehanızm qatelikter men baıqaýsyzdar áskerı qaqtyǵystyń shyǵyp ketýine jol bermeýi kerek.
Eki el 2022 jyldyń tamyzynda AQSh-tyń Ókilder palatasynyń spıkeri Nensı Pelosı Taıvanǵa barǵannan keıin úzilgen baılanysty qalpyna keltirip jatyr.
Sondaı-aq fentanıl esirtkisiniń zańsyz taralýymen kúresýde taraptardyń kózqarasy ortaq. Olar fentanılge arnalǵan prekýrsor óndiretin naqty bir kompanııalarǵa yqpal etip, olardyń sanyn qysqartý jospary boıynsha jumys isteıdi. Jyl saıyn esirtkiniń osy túrinen on myńdaǵan amerıkalyq qaza tabady.
Sonymen qatar taraptar jasandy ıntellekt pen klımat máselelerimen birigip jumys isteýge kelisti.
Kún tártibindegi kúrdeli másele – Taıvan boldy. Qytaı kóshbasshysy Amerıka-Qytaı qarym-qatynasynda Taıvan únemi «eń mańyzdy ári názik másele» bolǵanyn atap ótti. Sı Tszınpın AQSh-ty Taıvandi qarýmen jabdyqtaýdy toqtatyp, «Qytaıdyń beıbit jolmen birigýin» qoldaýǵa shaqyrdy.
Al amerıkalyq tarap Qytaıdan Taıvanda 2024 jyldyń qańtarynda ótetin saılaý aldyndaǵy protseske qurmetpen qaraýdy surady.
Sonymen qatar Djo Baıden ustalǵan AQSh azamattaryna, adam quqyqtary men «Ońtústik Qytaı teńizindegi májbúrli is-qımylǵa» qatysty Qytaı áreketine alańdap otyrǵanyn jetkizdi.
Qytaı kóshbasshysy Sı Tszınpın Qurama Shtattardy «Qytaıdy basyp tastaýdy nemese ustap turýdy josparlamaýǵa» shaqyrdy.
— Qurama Shtattardan asyp túsý nemese ornyn basý Qytaı josparynda joq, sol sebepti AQSh-tyń Qytaıdy basyp tastaý nemese ustap turýdy josparlamaǵany abzal. Eki tarap ta bir-biriniń prıntsıpi men túpki maqsatyn túsinýi kerek, alaýyzdyq pen másele týdyrmaı, shekaradan ótpeı, onyń ornyna jıirek dıalog pen pikirtalas ótkizip, kelispeýshilik pen qaıǵyly oqıǵalarǵa sabyrmen qaraý qajet, - dep málimdedi Sı Tszınpın.
AQSh prezıdenti Djo Baıden men Qytaı tóraǵasy Sı Tszınpınniń Kalıfornııadaǵy kezdesýi tik jáne eki basshy arasyndaǵy pikirtalasqa toly bolǵan.
Taraptar ózara qurmet kórsetý, beıbit ómir súrý, baılanysty saqtap turý jáne qaqtyǵysty boldyrmaý qajet ekenin atap ótti.
Atlantıkalyq keńestiń Eýrazııalyq ortalyǵynyń ǵylymı qyzmetkeri Mark Temnıtskı (Mark Temnycky) kezdesý jahandyq ınflıatsııa, álemdik azyq-túlik daǵdarysy men basqa da halyqaralyq máselelerge qarsy kúres tásilderin izdep jatqan kezde, shıeleniske toly tarıhı sátte ótkenin aıtty. Eki el arasynda buǵan deıin túsinispeýshilik bolǵanyna qaramastan, álem kóshbasshylary eki iri derjavanyń qarym-qatynasyn jaqsartýǵa nıetti. Sonymen qatar sarapshy álemdegi kúrdeli janjaldardy sheshýde AQSh-qa Qytaıdyń yqpaly qajet ekenin atap ótti.
Sı Tszınpın «Jer ǵalamshary úlken, eki el de jetistikke jete alady» dep túıindedi sózin.