AQSh-tan Almatyǵa esirtki jetkizgen qylmystyq top ustaldy
ALMATY. KAZINFORM – Almatyda esirtki kontrabandasynyń arnasy joıyldy.
Almaty qalasynyń arnaıy prokýrorlary esirtki zattarynyń asa iri kólemdegi kontrabanda faktisi boıynsha sotqa deıingi tergep-tekserýdi aıaqtady.
Tergeý barysynda jazasyn penıtentsıarlyq mekemede ótep jatqan sottalǵan adam Amerıka Qurama Shtattarynan Almatyǵa esirtki quraly - marıhýana men kannabıs syǵyndysy salynǵan sálemdemelerdi jetkizý arnasyn uıymdastyrǵany anyqtaldy. Qylmystyq áreketke uıymdastyrýshylar, kýratorlar, qamqorshylar, dropperler, jasyryn belgileýshiler jáne ólshep oraýshylar tartylǵan.
Jedel is-sharalar nátıjesinde «Jetisý» keden beketinde salmaǵy 43 kg marıhýana men kannabıs syǵyndysy salynǵan 25 sálemdeme tárkilendi. Olar is boıynsha zattaı dáleldemeler dep tanyldy.
Tergeý jáne jedel-izdestirý is-sharalarynyń kesheni, sondaı-aq sot saraptamalarynyń nátıjeleri, aıyptalýshylardyń quqyqqa qarsy qyzmetin rastady. 20 kúdikti, onyń ishinde ulttyq qaýipsizdik organynyń 2 qyzmetkeri jáne qylmystyq toptyń qyzmetine qamqorlyq kórsetken QR ІІM QAJK-niń 3 qyzmetkeri ustaldy.
Іs boıynsha aıyptalýshylarǵa esirtki zattaryn kontrabandalaǵany jáne satqany, sondaı-aq laýazymdyq qylmysy úshin jaýaptylyqty kózdeıtin baptar boıynsha aıyp taǵyldy.
Zańsyz qyzmetten alynǵan tabysty kúdiktiler jyljymaıtyn múlikti, jer ýchaskelerin jáne avtokólik quraldaryn satyp alý jolymen zańdastyrǵan.
Sottyń sanktsııasymen 5 páterge, 3 qurylysqa, 10 jer ýchaskesine jáne 44 avtokólik quralyna tyıym salyndy. 30.09.2025 j. qylmystyq is máni boıynsha qaraý úshin Qylmystyq ister jónindegi mamandandyrylǵan aýdanaralyq sotyna joldandy.
– Almaty qalasynyń prokýratýrasy esirtki quraldarynyń zańsyz aınalymy aýyr qylmys bolyp tabylatynyn jáne qatań túrde qylmystyq jaýaptylyqqa tartylatynyn eskertedi. Óziniń jeke derekterin úshinshi tulǵalarǵa berý kezinde saqtyq tanytýdy eske salmyz, - delingen prokýratýra habarlamasynda.
Aıta keteıik, Qyzylordada sıntetıkalyq esirtkini jarnamalaıtyn 1 120 saıt buǵattaldy.
Jyl basynan beri 26 tonnadan astam esirtki tárkilendi.