AQSh-ta zańsyz júrgen 500 myńnan astam mıgrant deportatsııalandy

ASTANA. KAZINFORM — Donald Tramptyń ekinshi prezıdenttik merzimi bastalǵannan beri 500 myńnan astam zańsyz mıgrant AQSh-tan deportatsııalandy, dep jazdy Belta. 

AQSh ishki qaýipsizdik mınıstrliginiń málimetinshe, taǵy 1,6 mıllıon adam elden óz erkimen ketken. 

— AQSh-tan eki mıllıonnan astam qujatsyz mıgrant ketti, onyń ishinde 1,6 mıllıony óz erkimen shyqqan. Al 527 myńnan astamy deportatsııalanǵan, — delingen mınıstrlik aqparatynda.

Mınıstrlik jaqyn arada deportatsııa boıynsha jańa rekordtar ornatady. Tramptyń qazirgi prezıdenttik merziminiń birinshi jylynyń sońyna qaraı shamamen 600 myń adam elden shyǵarylýy múmkin.

Mınıstrlik málimetinshe, AQSh elden óz betimen ketýdi josparlaǵandarǵa 1000 dollar tólem jáne tegin reıs usynady.

Inaýgýratsııa kúni Tramp AQSh-tyń 47-shi prezıdenti retindegi alǵashqy sózinde zańsyz mıgranttardyń Amerıka terrıtorııasyna kirýin dereý toqtatyp, mıllıondaǵan sheteldikti ekstradıtsııalaý protsesin bastaýǵa ýáde berdi. Ol sondaı-aq AQSh-tyń Ońtústik shekarasyndaǵy jaǵdaıǵa baılanysty ulttyq tótenshe jaǵdaı rejımin engizdi.

Qazir AQSh-ta zańsyz júrgen mıgranttar olardy deportatsııalaý máselesi sheshilmeıinshe, kepildikpen bosatylý múmkindigin paıdalana almaıdy.

Aıta keteıik, bıyl sońǵy onjyldyqta alǵash ret AQSh-qa kelgenderden ketkender sany kóbeıgen.