AQSh-taǵy úıinen aıyrylǵan Batyrhan Shúkenovtiń uly men áıeli qazaqstandyq metsenattardyń kómegine júgindi
ASTANA. QazAqparat - Batyrhan Shúkenovtiń azamattyq áıeli Ekaterına Shelıakova men uly Maqsut Shúkenov Andreı Malahovtyń «Pýst govorıat» baǵdarlamasynda ataqty mýzykanttyń qazasynan keıingi ómirleri jaıly aıtty.
Batyrhan Shúkenov Ekaterına Shelıakovamen 20 jyl birge turdy, eki uly dúnıege keldi. Tuńǵyshy sábı shaǵynda kóz jumdy, al ekinshisi - 14 jastaǵy Maqsut anasymen AQSh Florıda shtatynda turady.
Ekaterına men Maqsut Batyrhan Shúkenovtiń olardy Florıdadaǵy úlken úıge kóshirý armany týraly aıtty. Quny 680 myń dollardy quraıtyn úı salyndy. Batyrhan Shúkenov qurylys kompanııasyna alǵashqy jarnany tólep, Ekaterına ulymen sol úıge kóshti. Ánshiniń qazasynan keıin tólem túspegendikten qurylys kompanııasy úıdi tartyp aldy. Qazir ol ulymen AQSh-ta qurbysynyń úıindegi shaǵyn bólmede turyp jatyr. Ekaterına sırek kezdesetin buıymdar dúkeninde jumys isteıdi.
B.Shúkenovtiń dosy, Qazaq KSR Halyq ártisi Roza Rymbaeva Ekaterınaǵa ulymen Qazaqstanǵa kóshýdi usyndy. Batyrhannyń Máskeýdegi dostary, sonyń ishinde jýrnalıst Otar Kýshanashvılı oǵan Reseıge kóshýge usyndy.
Batyrhannyń aǵasy - Baýyrjan Shúkenov «Pýst govorıat» baǵdarlamasynda Maqsutqa AQSh-ta úı satyp alý úshin qarajat jınap jatqanyn aıtty.
Ánshiniń jaryn qoldaý úshin baǵdarlamaǵa ánshiler, mýzykanttar jáne dostar Valerıı Meladze, Sevara, Alekseı Glyzın, telejúrgizýshi Elena Hanga keldi.
Barlyǵy Batyrhan Shúkenov januıasy men dostary arasynda jaqsy adam bolyp máńgi este qalatynyn atap ótti.
Ekaterına bul baǵdarlamaǵa kúıeýi ajal qushqanynan keıin qalaı tirshilik keship jatqandary jaıly aıtýǵa kelgenin jetkizdi. Eger qazaqstandyq metsenattar Batyrhannyń uly Maqsuttyń shyǵyndarynyń bir bóligin moıyndaryna alsa, muny baǵalap, rızashylyqpen qabyldaıtynyn da aıtty.
