AQSh-taǵy týrnır: Qazaq golfshy ekinshi boldy
ASTANA. QazAqparat - AQSh-TYŃ Orlando qalasynda 12-14 naýryz aralyǵynda Major Champions Invitational biregeı golf-týrnıri ótti, dep habarlaıdy «SPORTINFORM» SAA.
Týrnırge meıdjorlardyń birneshe dúrkin chempıondary, tanymal 18 golfshy jáne Seve Ballesteros qory demeýshilik jasady. Jarys ıdeıasy meıdjorlardyń alty márte jeńimpazy Nık Faldoǵa tıesili. Chempıondardyń árqaısysy týrnırge tórt adamnan turatyn óz komandasyn jasaqtap ákelgen. Komanda quramyndaǵy sportshylar 21 jasqa deıingi eki jigit jáne eki qyz bolýy kerek. Máselen, Rorı Makılroı óz komandasyna ırlandııalyq úzdik sportshylardy shaqyrsa, Adam Skot Avstralııa golfshylaryn jarysqa qosty. Sondaı-aq Ballesteros qorynyń komandasy ıspanııalyq golfshylardan quralsa, Dastın Djonson, Djordan Spıts, Djım Fıýrık amerıkalyq jas talanttardy jınaǵan.
Al qazaqstandyq golfshy Dáýlet Tóleýbaevty týrnırge aty ańyzǵa aınalǵan golf sheberi Djek Nıklaýs shaqyrǵan. Dáýletten basqa komandada PGA Junior 2017 chempıony Akshaı Bhatııa, qyzdar arasyndaǵy kóptegen týrnırlerdiń jeńimpazy Elımı Noa jáne ıýnıorlar arasynda aıtýly jetistikterge qol jetkizip júrgen Anıtra Khotch bar.
Týrnır úsh raýndqa sozyldy. Tórt qatysýshynyń eń úzdik úsh kórsetkishi esepke alyndy. Nátıjesinde, Dáýlet Tóleýbaev qatysqan komanda -12 upaımen ekinshi orynǵa taban tiredi. Birinshi oryndy álemdik reıtıngte kósh bastap turǵan Dastın Djonsonnyń quramasy aldy. Olardyń kórsetkishi -19. Úshinshi oryndy Tom Vatsonnyń komandasy ıelendi.
Aıta keterligi, qazaqstandyq jankúıerlerdi qýantqan taǵy bir jaǵdaı - týrnırdiń qorytyndy protokolynda Nıklaýstyń komandasynyń tusyna Qazaqstan Týy ornalastyrylǵan.
