AQSh-taǵy tabıǵat apatynan 7 adam qurban boldy
ASTANA. QazAqparat - Ótken demalys kúnderinde AQSh-tyń Tehas, Mısýrı, Mısısıpı, Arkanzas, Alabama, Oklahoma jáne Lýızıana shtattarynda nóser jańbyr jaýyp, boran soǵyp, kúshti quıyn boldy, dep habarlaıdy TASS.
Jeksenbi kúni tabıǵattyń dúleı kúshiniń qurbanyna aınalǵandar sany 7 adamǵa jetti. Ózgelerge qaraǵanda, tabıǵı apattan Tehastyń shyǵysy qatty zardap shekti. Onda ótken táýlikte tornado 4 adamnyń ómirin qıdy, 50 adam túrli dene jaraqattaryn aldy. Keńdigi 25 km bolatyn quıyn 56 km aımaqty súrip ótti. «Shyǵyn óte kóp. Oqıǵanyń saldaryn kózge elestetýdiń ózi qorqynyshty»,-dedi jeksenbi kúni ótken baspasóz máslıhatynda Dallastan 80 km aımaqta ornalasqan Kanton qalasynyń meri.
Munda aýa raıynyń kúrdeliligine baılanysty oqıǵanyń saldarymen kúres jumystaryn toqtatý qajet boldy, deıdi Van-Zand (Tehas shtaty) okrýginiń atqarýshy bıliginiń basshysy Don Kırkpatrık.
«Biz qutqarýshylarmen birge jumystardy jalǵastyrýǵa tyrysamyz jáne tornado qaıtalanǵan jaǵdaıda ol týraly halyqty habardar etemiz»,-dedi ol.
Arkanzas shtatynan áıel azamattyń qaıtys bolǵany jóninde habar kelip tústi. Onyń úıine jeldiń kúshine shydaı almaǵan aǵash qulaǵan. Taǵy bir azamat Mısısıpıdiń ortalyq bóliginde mert bolǵan. Ázirge qaıǵyly jaǵdaıdyń sebep-saldary aıtylmaı otyr. Osyǵan deıin bir adamnyń Mıssýrı shtatyndaǵy nóser jańbyrdan keıin bolǵan sý tasqynynyń saldarynan kóz jumǵandyǵy aıtylǵan bolatyn.
Sondaı-aq Oklahoma shtatynda da sý tasqynynń saldarynan elektr jelileri úzilip, kólik qozǵalysy shekteldi. Atalǵan shtattarda tótenshe jaǵdaı jarııalandy.
Mıssýrı shtatynyń gýbernatory Erık Greıtens senbi kúni apat bolǵan aımaqtardy aralap kórdi.
«Men Mıssýrı turǵyndarynyń barlyǵyn ótken túnde tabıǵat apatynan zardap shekkenderdiń jaǵdaıynyń ońalýyn tileýdi suraımyn. Shtattyń barlyq aımaǵyndaǵy turǵyndar jyldamdyǵy sekýndyna 67,9 metrdi quraıtyn aıaq astynan bolǵan myqty jeldiń kúshine tap boldy»,-dedi ol.
