AQSh-taǵy sel: Kóshede tabyttar júzip júr
ASTANA. QazAqparat - Amerıkandyq Ońtústik Karolına shtatyndaǵy sel saldarynan 11 adam qaza tapty, myńdaǵan jan bas saýǵalap ketti. Bul týraly Reuters Ońtústik Karolınanyń qoǵamdyq qaýipsizdik departamentine silteme jasap habarlady.
"Qaza tapqandardyń jeteýi sýǵa batyp ketken, tórteýi selge baılanysty týyndaǵan jol-kólik apatynda kóz jumdy", - delingen habarlamada.
Sınoptıkterdiń aqparatynsha, shtattyń jeke aýdandarynda sońǵy úsh kúnde jaýyn-shashyn deńgeıi 610 mm jetti, bul jyldyq mólsherden sál az. Qaýipsizdik maqsatynda bılik shamamen 550 jol men kópirdi jabýǵa májbúr boldy.
Myńdaǵan adam úıinen ketip, baspana izdeýge májbúr boldy. Shamamen 40 myń adam aýyz sýsyz qaldy.
