AQSh-taǵy saılaý: demokrattar Senatta baqylaý basymdyǵyna ıe boldy

ASTANA. QazAqparat – Demokratııalyq partııa Senattaǵy baqylaý basymdyǵyn saqtap qala aldy. BAQ Nevadadaǵy aralyq saılaýda demokrat Ketrın Kortes Masto jeńedi dep boljap otyr. Palatada baqylaý júrgizý úshin kúres áli de jalǵasyp jatyr, degenmen AQSh prezıdenti, demokrat Djo Baıden saılaý nátıjelerine rıza ekenin málimdedi, dep habarlaıdy QazAqparat VVS-ge silteme jasap.

Alty jyl buryn Senatqa alǵash bolyp saılanǵan latynamerıkalyq Masto respýblıkalyqtardyń kandıdaty Adam Laksaltty basyp ozdy. Adam Laksaltty burynǵy prezıdent Donald Tramp qoldaǵan bolatyn.

Osylaısha, qazirgi ýaqytta Senatta Demokratııalyq partııa 50 oryn, Respýblıkalyqtar 49 orynǵa ıe bolyp otyr.

Daýys berý nátıjesi ázirge belgisiz jalǵyz shtat – Djordjııa. Onda 6 jeltoqsanda Senat saılaýynyń ekinshi kezeńi ótedi. Alaıda, respýblıkalyqtardyń kandıdaty Djordjııada jeńiske jetse de, Senattaǵy teń daýysty AQSh vıtse-prezıdenti, demokrat Kamala Harrıs sheshedi.

«Men rızamyn jáne kelesi jyldardy asyǵa kútemin», - dedi Djo Baıden saılaýdyń boljamdy nátıjesine baılanysty.

Senatta baqylaý basymdyǵyn saqtaý demokrattar Baıden usynǵan kandıdattardy, sonyń ishinde federaldy sýdıalardy resmı laýazymdarǵa bekite alatynyn bildiredi.