AQSh-taǵy saılaý: 7 mln adam merziminen buryn daýys berdi
ASTANA. QazAqparat - AQSh-taǵy aralyq saılaý aldynda 7 mln adam merziminen buryn daýys berdi, dep habarlaıdy «QazAqparat» HAA The New York Times gazetine silteme jasap.
Aldyn ala málimetterge qaraǵanda, AQSh-taǵy bul jolǵy aralyq saılaýǵa Respýblıkashyldar partııasyn jaqtaıtyndar erekshe qyzyǵýshylyq tanytyp otyr.
AQSh-ta aldyn ala daýys berý jeke jáne poshta arqyly júrgiziledi. Birinshi nusqany tańdaıtyn saılaýshylar, statıstıkaǵa qaraǵanda, ádette demokrattardy qoldaıdy. Poshta arqyly negizinen egde jastaǵy amerıkalyqtar daýys beredi.
Aıta keteıik, 6 qarashada ótetin saılaýda 100 senatordyń 35-i, Kongress Ókilder palatasynyń 435 múshesiniń barlyǵy, sondaı-aq shtattar men aýmaqtardyń 39 gýbernatory qaıta saılanady.
Ókilder palatasyndaǵy respýblıkashyldar men demokrattardyń qatynasy 236-ǵa 193 bolyp otyr. Taǵy alty oryn bos tur. Kongrestiń tómengi palatasyn baqylaýǵa qol jetkizý úshin demokrattar qosymsha 23 mandat alýy tıis.
