AQSh-taǵy prezıdenttik jarys otbasylardy oırandaýda
ASTANA. 25 qazan. QazAqparat - Álemdegi eń iri saýda júıeleriniń biri amerıkandyq Wal-Mart júıesiniń negizin qalaýshy mıllıarder Sem Ýoltonnyń týysqandary prezıdenttik saılaý aldynda
saıası kózqarastary bir-birine qaıshy kelip, alaýyzdasyp qaldy. Bul týraly Forbes jazady.
Basylymnyń habarlaýynsha, Ýoltonnyń nemeresi Sem Rolıngs Ýolton otbasynyń basqa múshelerine qarsy shyǵyp, AQSh-tyń qazirgi prezıdenti Barak Obamanyń saılaýaldy kampanııasyna qyrkúıek aıynda 300 myń dollar bergen. 2008 jyly da ol Obamany qoldap, saılaýaldy is-shalarǵa 30 myń dollar qarajat quıǵan.
Al Sem Rolıngstiń nemere aǵasy Djım Ýolton óz kezeginde Obamanyń qarsylasy, respýblıkashyldardyń kósemi Mıtt Romnıdiń saılaýaldy baǵdarlamasyn qoldaıtyn Restore Our Future qoryna 300 myń dollar salǵan.
Respýblıkashyldardy Sem Rolıngstiń eki tátesi de - Elıs pen Krıstı Ýoltondar qoldap otyr. Olar óz qaltalarynan Restore Our Future qoryna 200 myń dollar, al Our Destiny qoryna 50 myń dollar baǵyttaǵan.
Ýoltondar áýletiniń barlyq derlik músheleri kóptegen jyldar boıy Forbes jýrnaly jasaıtyn AQSh-tyń eń baı adamdary tiziminen túspeı keledi. Mysaly, bıylǵy qyrkúıektegi tizim boıynsha olar 6-dan 9-shy oryndarǵa jaıǵasty, baılyqtary 26,1-27,9 mlrd. dollar kóleminde baǵalanýda.
Wal-Mart júıesi 1961jyly qurylǵan bolatyn. Qazir onyń negizin qalaýshynyń otbasyna aktsııalardyń jartysyna jýyǵy tıesili. Júıeniń basqarýynda jer sharynda 9 myńǵa jýyq dúken bar.
