AQSh-taǵy prezıdent saılaýy: Tramptyń alǵashqy básekelesi paıda boldy

VAShINGTON. QazAqparat – Ońtústik Karolına shtatynyń burynǵy respýblıkashyl gýbernatory jáne AQSh-tyń BUU janyndaǵy turaqty ókili bolǵan Nıkkı Heılı 2024 jylǵy prezıdenttik saılaýǵa túsýge daıyn ekenin málimdedi, dep habarlaıdy QazAqparat CNN-ge silteme jasap.

Ol – AQSh-tyń burynǵy prezıdenti Donald Tramppen 2024 jylǵy prezıdenttik saılaý dodasynda Respýblıkalyq partııa atynan talasatyn alǵashqy úmitker. Saılaýǵa túsý nıeti týraly resmı málimdemesinde Heılı Vashıngtonnyń amerıkalyqtardy birneshe ret sátsizdikke ushyratqanyn atap ótti.

«Kóshbasshylardyń jańa býynyna qarjylyq jaýapkershilikti qaıta alatyn, shekara qaýipsizdigin qamtamasyz etetin jáne bizdiń memleketti, maqtanyshymyz ben maqsatymyzdy nyǵaıtatyn ýaqyt keldi», - dedi Nıkkı Heılı.

Ol endi Charlstonda óziniń saılaýaldy naýqanynyń bastalýyna arnalǵan sharada sóz sóıleıdi degen jospar bar.

Aldyn ala saılaýda joly bolsa, Heılı Respýblıkalyq partııa prezıdenttikke usynǵan alǵashqy áıel jáne Amerıkanyń shyǵý tegi azıattyq alǵashqy azamaty bolmaq.

Heılı Donald Tramptyń prezıdenttigi kezinde AQSh-tyń BUU janyndaǵy turaqty ókili qyzmetin atqardy. Ol isker áıelder ulttyq qaýymdastyǵynyń burynǵy prezıdenti, alǵash ret 2004 jyly Ońtústik Karolına Ókilder palatasyna saılandy. Alty jyldan keıin, 2010 jyly shtattyń gýbernatory bolyp saılanǵan alǵashqy áıel jáne 2011 jyly qyzmetine kirisken kezde eldegi eń jas gýbernator boldy. AQSh-tyń BUU janyndaǵy elshisi bolý úshin ekinshi merziminiń ortasynda otstavkaǵa ketti.

Buǵan deıin Donald Tramptyń prezıdenttik naýqandy bastaǵany týraly habarlanǵan bolatyn.

Foto: Wade Vandervort/AFP/Getty Images