AQSh-taǵy qalanyń turǵyndaryna jabaıy qustar kún kórsetpeı jatyr
ASTANA. QazAqparat - Amerıkanyń Nıý-Djersı shtatyndaǵy Tınek qalasynyń ákimshiligi jabaıy kúrketaýyqtarmen gýmanıstik ádispen kúrespek - olar qustardy úrkitý úshin qatty dybys shyǵaratyn 20 pnevmo klakson satyp alýdy kózdep otyr, dep jazady Yahoo! News basylymy.
Haıýanattardy baqylaý jónindegi maman Vınsent Askoleze klaksondardy turǵyndarǵa taratý úshin qala sheneýnikterine tapsyratynyn málimdedi.
«Biz haıýanattarmen beıbit ári birge ómir súrýdiń amalyn taba bilýimiz kerek», - dedi ol.
Óz kezeginde, shtattaǵy jabaıy tabıǵatty qorǵaý basqarmasynyń ókili Emı Shvaıtser seısenbi kúni adamdarǵa shabýyldaǵan shaqar qorazdyń ustalyp torǵa qamalǵanyn, al onsyz basqa jabaıy qustar jurttyń mazasyn almaıtynyn baıandady.
Qaladaǵy bılik ókilderiniń aıtýynsha, turǵyndardan jabaıy kúrketaýyq shabýyldady degen on shaqty shaǵym túsken. Bir turǵyn tipten polıtsııaǵa aryzdanǵan. Qustar adamdarǵa umtylyp mazasyn alǵan jáne jolǵa shyǵyp kólik qozǵalysyna kedergi jasap otyr. Bir joly kúrketaýyq ashyq terezeden ushyp úıge kirip, ondaǵlardy ábigerge salǵan.
Qala ákimshiligi problemany sheshý tek shtat bıliginiń quzyretinde ekendigin, qustardy atyp-joıýǵa bolmaıtyndyǵyn eskertýde. Olar «turǵyndar tek qustardy gýmanıstik ádistermen, sý shlanglaryn qoldanyp nemese zattardy dańǵyrlatyp qana úrkite» alady dep málimdedi.
Eske sala keteıik, aqpan aıynda kórshiles Hıllsdeıl qalasynyń poshta qyzmetkerine quqyq qorǵaýshylardyń kómekke júginýine týra keldi. Óıtkeni onyń kóligin jabaıy kúrketaýyqtar qorshap alyp, aıbat shekken.
