AQSh-taǵy iri alaıaqtyq: Mınıstrlik úsh qazaqstandyqtyń aty-jónin jarııalady
ASTANA. QazAqparat - QR Syrtqy ister mınıstrligi AQSh-taǵy iri alaıaqtyq áreketterge úsh Qazaqstan azamatynyń qatysqanyn rastady, dep xabarlaıdy QazAqparat tilshisi.
"Bizdiń Nıý-Iork qalasyndaǵy bas konsýldyǵymyz Amerıka tarapymen tyǵyz qarym-qatynasta, qajetti konsýldyq jáne quqyqtyq qorǵaýǵa qatysty kómek kórsetilip jatyr. Nıý-Iork shtatynyń ońtústik okrýgynan kelip túsken málimetke sáıkes, qamaýǵa alynǵan azamattardyń arasynda bizdiń úsh azamatymyz bar. Olar - Azıza Djavadazade nemese Djalolova, 1994 jyly týǵan, Dıora Áshirova, 1991 jyly týǵan, jáne Elena Qudaıbergenova, 1970 jyly týǵan. Biz olardyń Qazaqstan azamattary ekenin rastaımyz. Olardy qamaýǵa aldy. Biz óz tarapymyzdan tıisti kómek berip jatyrmyz", - dedi Q.Ábdiraxmanov jýrnalısterge bergen suxbatynda.
Aıta keteıik, buǵan deıin sheteldik buqaralyq aqparat quraldarynda Nıý-Iork qalasynda qylmystyq toptyń ustalǵany jaıynda jazyldy. 25 adam iri alaıaqtyqpen aınalysty. Olar ǵalamtorda jalǵan xabarlandyrýlardy ornalastyryp, kólikterdi satqan. Alaıda ýaqytsha fırmalar arqyly aldyn ala tólem alǵannan keıin izderin jasyryp otyrǵan. Osylaısha, alaıaqtar 4,5 mln dollardy qoldy qylǵan. Nıý-Iork shtatynyń zańnamasy boıynsha qylmyskerler 20-30 jylǵa deıin bas bostandyǵynan aıyrylýy múmkin.
