AQSh-taǵy alaıaqtyq: Qazaqstandyqtardyń kelesi sot tyńdalymy aqpanda ótedi - QR SІM
ASTANA. QazAqparat - AQSh-ta alaıaqtyq jasady dep aıyptalǵan Qazaqstan azamattary boıynsha kelesi sot tyńdalymy 2019 jyldyń aqpan aıynda ótedi. Bul týraly QR SІM resmı ókili Aıbek Smadııarov brıfıngte málimdedi, dep habarlaıdy QazAqparat tilshisi.
«Atalǵan is boıynsha alǵashqy sot jazda ótken bolatyn. Ekinshi sotqa keler bolsaq, tergeýshiler túrli elden kelgen 20-dan astam adam qatysqan bul iske qosymsha ýaqyt surady. Sol sebepti, kelesi sot tyńdalymy 2019 jyldyń aqpanyna belgilendi», - dep túsindirdi Aıbek Smadııarov.
Sonymen birge, ol Qazaqstannyń Nıý-Iorktegi Bas konsýldyǵynyń kómegimen barlyq 3 azamatshanyń qamaýdan bosatylǵanyn atap ótti.
«Olardyń barlyǵy kepilmen bosatylǵan jáne qaladan shyqpaý týraly qolhat jazǵan», - dep óz sózin tolyqtyrdy Aıbek Smadııarov.
Aıta keteıik, buǵan deıin sheteldik BAQ-ta Nıý-Iork qalasynda 25 adamnan quralǵan qylmystyq toptyń ustalǵany jaıynda jazyldy. Іri alaıaqtyq áreketterge úsh Qazaqstan azamatynyń qatysqanyn QR Syrtqy ister mınıstrligi rastady.
Olar ǵalamtorda jalǵan xabarlandyrýlardy ornalastyryp, kólikterdi satqan. Alaıda ýaqytsha fırmalar arqyly aldyn ala tólem alǵannan keıin izderin jasyryp otyrǵan. Osylaısha, alaıaqtar 4,5 mln dollardy qoldy qylǵan. Nıý-Iork shtatynyń zańnamasy boıynsha qylmyskerler 20-30 jylǵa deıin bas bostandyǵynan aıyrylýy múmkin.
