AQSh-taǵy jasóspirimniń qazasynan keıin ChatGPT-de ata-ana baqylaýy engizildi
TÚRKІSTAN. KAZINFORM — ChatGPT ázirleýshisi amerıkalyq OpenAI kompanııasy mobıldi qurylǵylarda jáne chat-botynyń veb-nusqasynda ata-ana baqylaýyn iske qosty, dep habarlaıdy DW.
Endi ata-analar balalardyń akkaýnttaryn óz akkaýnttaryn arqyly baqylap otyra alady. Bul balalardy belgili bir kontent túrlerinen qorǵaýǵa múmkindik beredi, dep habarlady chat-bot ázirleýshileri. Sonymen qatar, ata-analar ChatGPT qoldaný ýaqytyn shekteı alady jáne birqatar fýnktsııany, sonyń ishinde sýret generatsııasyn óshire alady.
Chat-bot budan bólek, kámeletke tolmaǵan qoldanýshyda yqtımal kúrdeli problemalar týyndaǵan jaǵdaıda ata-analardy habardar etetin bolady. Alaıda ázirleýshilerdiń aıtýynsha, ata-analar balalardyń chattaǵy hat-habar tarıhyna tolyq qol jetkize almaıdy.
Tamyz aıynyń sońynda AQSh-ta 16 jastaǵy jasóspirim ózine qol jumsaǵannan keıin, onyń ata-anasy ChatGPT-ti jasaǵan OpenAI kompanııasyn sotqa bergen edi. Ata-analar kompanııany balasyna sýıtsıd jasaýǵa kómektesti dep aıyptap otyr. Dálel retinde olar balanyń smartfonynan tabylǵan jasandy ıntellektpen jazysqan hat-habardy usynǵan.
Aıta ketelik Tsıfrlyq damý, ınnovatsııalar jáne aeroǵarysh mınıstrligi Jasandy ıntellekt jáne ınnovatsııalardy damytý komıteti tóraǵasynyń orynbasary Álibek Saılanbaev ChatGPT-diń kómegine júgingen kezde derekterdi urlatyp almaý úshin qandaı saqtyq sharalaryn qoldaný kerektigin aıtqan edi.