AQSh-taǵy jaǵdaı dúnıe júzinde shamamen 84 mıllıon jumys ornyna áser etedi - BUU

ASTANA.KAZINFORM - Halyqaralyq eńbek uıymynyń (HEU) bıylǵy jumyspen qamtý jónindegi jańartylǵan boljamy boıynsha álemde 53 mıllıon jumys orny ashylady, dep habarlaıdy BUU jańalyqtary.

Bul aldyn ala boljanǵan kórsetkishten jeti mıllıonǵa az.

Dúnıejúzilik jumyspen qamtý jáne áleýmettik boljam esebine sáıkes, jumys oryndarynyń ósýiniń baıaýlaýyna ákeletin negizgi faktorlar geosaıası shıelenis pen jahandyq saýdadaǵy úzilister. 2025 jyly jumyspen qamtýdyń ósý boljamy 1,7%-dan 1,5%-ǵa deıin tómendedi, bul shamamen jeti mıllıon qosymsha jumys ornyna teń.

Tómendeý jahandyq JІÓ ósiminiń burynǵy 3,2% boljammen salystyrǵanda 2,8%-ǵa deıin baıaýlaǵanyn kórsetedi.

HEU dúnıe júzindegi 71 elde shamamen 84 mıllıon jumys orny AQSh-taǵy tutynýshylyq suranyspen tikeleı nemese janama baılanysty dep esepteıdi. Bul jumys oryndary jáne olardan túsetin kirister qazir saýda shıelenisteriniń kúsheıýine baılanysty buzylý qaýpine ushyrap jatyr.

– Jahandyq ekonomıka biz kútkennen de baıaý ósip jatyr, - dep túsindirdi HEU Bas dırektory Jılber Ýngbo. – Eger biz geosaıası shıelenis pen saýdanyń buzylýy sııaqty máselelerdi sheshpesek, jahandyq eńbek naryǵyna keri áser kúsheıedi.

Baıandama avtorlary sonymen qatar kiristerdi bólýdegi alańdatarlyq tendentsııalarǵa nazar aýdarady: búkil álem boıynsha jumysshylarǵa túsetin JІÓ úlesi 2014 jylǵy 53%-dan 2024 jyly 52,4%-ǵa deıin tómendedi. Eger bul úles ózgerissiz qalsa, 2024 jyly jahandyq eńbek tabysy bir trıllıon dollarǵa óser edi.

Boljamdarǵa sáıkes, dúnıe júzinde árbir tórtinshi jumysshy generatıvti JI engizý arqyly jumysynyń ózgergenin kóre alady.