AQSh-taǵy úndilik stýdentter usaq-túıek tártip buzǵany úshin de deportatsııalanýy múmkin

ASTANA. KAZINFORM – Buryn zardaby aýyr emes usaq quqyqbuzýshylyqtar jasaǵan stýdentterge qatań shara qoldanylmaıtyn, al qazir osyndaı áreketter úshin deportatsııalanýy múmkin, dep habarlaıdy Kazinform menshikti tilshisi The Economic Times basylymyna silteme jasap.

Immıgratsııalyq sarapshylardyń aıtýynsha, Tramp ákimshiligi kezinde ımmıgratsııalyq saıasatty kúsheıtý jaǵdaıynda usaq urlyq, mas kúıinde kólik júrgizý jáne baǵdarshamnyń qyzyl túsine ótip ketý sııaqty quqyq buzýshylyqtar stýdentterdiń ımmıgratsııalyq mártebesin joıýǵa negiz boldy.

Mundaı quqyq buzýshylyqtar buryn jazalaýdy, onyń ishinde keıde bas bostandyǵynan aıyrýdy da qarastyrǵanymen, stýdentterdi deportatsııalaýǵa ákelgen joq. Endi bılik stýdentterge shara qoldaný úshin tipti eski isterdi de qarap jatyr.

Osylaısha, eki jyl buryn úndilik stýdentke jyldamdyqty arttyrǵany úshin aıyppul salyndy – ol jyldamdyq shegi 70 bolǵanda saǵatyna 80 mıl júrgen. Sol kezde aıyppul tóledi. Endi oǵan deportatsııalaý qaýpi tónip tur, dedi esimin atamaýyn suraǵan isti júrgizip jatqan advokat.

Mıssýrı shtatynda turatyn Úndistannan kelgen taǵy bir stýdent mas kúıinde kólik júrgizgeni úshin qamaýǵa alyndy, biraq ol bir jyl boıy ishimdik ishýden bas tartý shartymen bosatyldy.

- Soǵan qaramastan meniń vızam kenetten joıyldy, - dedi ol.

Singhania & Co zań fırmasynyń seriktesi Aslam Ahmedtiń aıtýynsha, keıbir úndistandyq stýdentter jyldamdyqty asyrǵany nemese kólikti mas kúıinde júrgizgen úshin olardyń F-1 stýdenttik vızalarynyń jaramsyz ekendigi týraly jáne elden dereý ketýdi talap etetin elektrondyq hattar kelgen.

- Buryn bolmashy zańbuzýshylyqtar úshin eskertý alyp bosatylǵan kóptegen stýdentter qazir deportatsııa týraly habarlamalar alyp jatyr, 300-den astam vıza joıyldy, - dedi Singh Ahluwalia Attorneys at Law negizin qalaýshy Dıpak Ahlývalııa.

AQSh-tyń Іshki qaýipsizdik departamenti F-1, J-1 jáne M-1 vızalarynyń ıelerin qadaǵalaý júıesi júrgizetin SEVIS júıesinen olardyń derekterin joıyp jatyr, bul stýdentterge úlken soqqy –, dedi stýdentterge shetelde oqýǵa kómektesetin Collegify kompanııasynyń negizin qalaýshy Adarsh Khandelval.

Buǵan deıin AQSh prezıdenti Donald Tramp Garvard ýnıversıtetimen ashyq kúresi aıasynda bul mekemege qosymsha federaldyq qarjylandyrý túrinde bólingen 1 mlrd dollardy keri qaıtarýdy josparlap otyrǵanyn jazǵan bolatynbyz.