AQSh-taǵy shatdaýn saldarynan áýe reısteri keshikti

ASTANA. KAZINFORM – AQSh úkimeti jumysy men qarjylandyrý toqtatylǵanynnan bir aptadan soń dıspetcherlerdiń jumysqa shyqpaýyna baılanysty reısterdiń keshigýi men toqtatylý jaǵdaılarynyń sany artyp keledi, dep habarlaıdy ABC News.

Seısenbide Tennessı shtatyndaǵy Neshvıll halyqaralyq áýejaıynyń ústindegi áýe qozǵalysyn qadaǵalaıtyn munarada shekteýli ǵana qyzmetkerler jumys istep, osyǵan baılanysty qonatyn ushaqtardy Memfıstegi áýe qozǵalysyn basqarý ortalyǵy úılestirdi. Reıster ortasha eseppen eki saǵattan astam ýaqytqa keshiktirildi.

Azamattyq avıatsııa federaldy basqarmasynyń (FAA) nusqaýlaryna sáıkes, qyzmetkerler tapshylyǵyna baılanysty Dallasta (Tehas shtaty) reıstiń keshigýi ortasha eseppen 30 mınýtty, al Chıkagoda (Illınoıs shtaty) 40 mınýtty qurap otyr.

FAA qujattaryna sáıkes, Kalıfornııadaǵy Berbank áýejaıy áýe dıspetcherleriniń jetispeýshiligine baılanysty dúısenbide basqarý munarasyn birneshe saǵatqa jabýǵa májbúr boldy.

Dúısenbide Kolorado shtatyndaǵy Denver áýejaıynda 600-den astam jáne Arızonadaǵy Fenıks áýejaıynda 200-ge jýyq reıs toqtatyldy.

Áýe qozǵalysy dıspetcherleri Ulttyq qaýymdastyǵynyń (NATCA) málimetinshe, áýe dıspetcherleri jalaqynyń bir bóligin 14 qazanda alady, biraq úkimettiń jumysy toqtap tura berse, 28 qazanda qarjylandyrý bolmaıdy.

Dıspetcherler ómirlik mańyzy bar jumysshylar sanalady jáne úkimet jumysyn toqtatqan kezde jumystan shyǵarylmaıdy. Kólik departamenti jumysyn toqtatý josparyna sáıkes, shamamen 13 294 dıspetcher jumysyn jalaqysyz jalǵastyrady.

Buǵan deıin Nıý-Iork áýejaıynda eki ushaq soqtyǵysqanyn habarlaǵan edik.