AQSh-taǵy shatdaýn 40 kúnge sozyldy, 2,5 myńnan astam áýe reısi keıinge qaldy
ASTANA. KAZINFORM – AQSh-ta úkimettiń jumysyn qarjylandyrý máselesi sheshilmeı, el tarıhyndaǵy eń uzaq shatdaýn (úkimet jumysynyń toqtaýy) 40 kúnge jetti. Osyǵan baılanysty eldegi áýe qatynasy kúrt nasharlap, eki kún ishinde 2 500-den astam reıs toqtatyldy, dep habarlaıdy Euronews.
Demokrattar men respýblıkashylar densaýlyq saqtaý salasyn qarjylandyrýǵa qatysty kelisimge kele almaı otyr. Senat demalys kúnderi Vashıngtonda qalyp, úkimet jumysyn qalpyna keltirý máselesin qarastyryp jatyr, alaıda áli naqty sheshim tabylǵan joq.
Respýblıkashylar úkimet jumysyn qaıta bastaýǵa jáne birqatar memlekettik qurylymdardy jyl boıy qarjylandyrýǵa baǵyttalǵan zań jobasyn usynǵanymen, oǵan demokrattardyń qoldaýy jetkiliksiz.
«Bizge úkimet jumysyn qaıta bastaý týraly zań jobasyn qabyldaý úshin birneshe ǵana daýys jetpeı tur», — dedi Senattaǵy respýblıkashyl kópshilik jetekshisi Djon Týn senbi kúni.
Al demokrattar Obamacare baǵdarlamasy boıynsha densaýlyq saqtaýǵa arnalǵan sýbsıdııalardy taǵy bir jylǵa uzartýdy talap etýde. Respýblıkashylar bul usynysty qabyldamaı, tek qalypty nusqany talqylaýǵa daıyn ekenin jetkizgen.
Sarapshylardyń aıtýynsha, eger Kongress keńeıtilgen sýbsıdııalardy ýaqytyly bekitpese, kelesi jyly medıtsınalyq saqtandyrý jarnalary eki eseden artyq ósýi múmkin.
Senator Bernı Sanders respýblıkashylardyń sýbsıdııalardy uzartý jónindegi ýádesin «naqty kepildigi joq bos ýáde» dep atady. Al AQSh prezıdenti Donald Tramp jaqyn ýaqytta ymyraǵa kelý yqtımaldyǵy az ekenin málimdedi.
Áýe qatynasynda úlken aqaýlar tirkeldi
Federaldyq avıatsııa basqarmasyndaǵy qyzmetkerlerdiń jetispeýshiligine baılanysty eldiń shyǵys jaǵalaýyndaǵy birqatar iri áýejaılarda, sonyń ishinde Nıý-Iork pen Nıýark áýejaılarynda kóptegen reıster toqtatyldy nemese keshiktirildi.
Juma jáne senbi kúnderi AQSh avıakompanııalary 2 500-den astam reısti joıdy. Senbi, ıaǵnı saıahatshylar eń kóp ushatyn kúni, 1 500-ge jýyq reıs keıinge qaldyryldy, al jeksenbige arnalǵan taǵy 1 000 reıstiń toqtatylatyny habarlandy.
AQSh-taǵy bul shatdaýn eldiń ınfraqurylymyna, áýe qozǵalysyna jáne memlekettik qyzmet kórsetý sapasyna eleýli áser etip otyr. Sarapshylar jaqyn kúnderi Kongress kelisimge kele almasa, jaǵdaı odan ári ýshyǵýy múmkin ekenin eskertedi.