AQSh-taǵy saılaý: Vashıngton turǵyndaryn ne mazalaıdy
ASTANA. KAZINFORM — AQSh Kongresine aralyq saılaý el turǵyndarynyń demokratııalyq quqyqtardy jáne óz eliniń saıası bolashaǵyna táýelsiz áser etý múmkindigin qorǵaýǵa múddeli ekenin kórsetti, dep habarlaıdy Kazinform agenttiginiń Vashıngtondaǵy menshikti tilshisi.
Vashıngtondyq saılaýshy Steısı daýys berý týraly ǵana emes, sonymen qatar eldiń bolashaǵy jaıly da oı bólisti. Ol bolashaq urpaq úshin demokratııalyq bostandyqty saqtaı alamyz ba degen suraqqa alańdaıdy.
— Men eldegi demokratııany, onyń qalaı basqarylatynyn, oǵan qalaı qamqorlyq jasaıtynymyzdy jaqsyraq túsinip, kelesi urpaq úshin olar saılaýda basqa adamdar qalaǵandaı emes, ózderi qalaǵandaı daýys berý múmkindigin saqtaı alamyz dep úmittenemin, — dedi Steısı.
Steısı balalarǵa saılaýǵa erkin qatysyp, óz sheshimderin qabyldaı alatyn eldi mura etip qaldyrýǵa basa nazar aýdardy.
— Men olardyń [balalar] táýelsiz daýys bere alýyn, úkimettiń baqylaýynda bolmaı, óz pikirlerin bildire alýyn, olarǵa biz ne istegimiz keletinin, olardyń ne istegenin qalaıtynymyzdy aıtqym keledi. Bul bizdiń qolymyzdan keledi dep oılaımyn, — dep atap ótti Steısı.
Vashıngton turǵyny Aleks Kolýmbııa okrýgine shtat mártebesin berý máselesi sheshilmeı kele jatqanyn alǵa tartyp, bunyń burynnan kele jatqan, qaıtalana beretin taqyryp ekenin aıtty.
— Qalamyz bizdiń el retindegi demokratııalyq qundylyqtarymyzdy qoldaıdy dep kútemin. Bilesiz be, Kolýmbııa okrýginiń mártebesi qaıta-qaıta kóterilse de sheshimin tappaı otyrǵan másele. Bizde áli de shtat bolyp eńse kóterý jolynda eńbek etip kele jatqan talantty adamdar bar, — deıdi Aleks.
Onyń aıtýynsha, okrýg turǵyndary jergilikti saılaýǵa udaıy qatysqanymen, AQSh Kongresinde tolyq saıası ókildigi joq.
— Biz, árıne jergilikti saılaýǵa qatysyp, óz ómirimizge áser ete alamyz, biraq okrýg bolǵandyqtan tolyqqandy saılaýshy retinde quqyǵymyz shekteýli, — dedi Aleks.
Buǵan deıin AQSh Kongresinde bılik aýysýy múmkindigin, demokrattar Ókilder palatasyn baqylaýǵa alyp jatqanyn habarlaǵan edik.
