AQSh-taǵy Regeneron ISEF 2026 kórmesinde Qazaqstan namysyn 7 jas ǵalym qorǵaıdy
ASTANA. KAZINFORM – 9-15 mamyr aralyǵynda AQSh-tyń Arızona shtatyndaǵy Fınıks qalasynda Regeneron ISEF 2026 dúnıejúzilik ǵylymı-ınjenerlik kórmesi ótedi. Jahandyq ınnovatsııalyq dodaǵa álemniń 60-tan astam elinen iriktelgen 1 700-ge jýyq mektep oqýshysy qatysady, al jarystyń jalpy júlde qory 7 mıllıon AQSh dollaryn qurap otyr.
Halyqaralyq ǵylymı baıqaýda el namysyn qorǵaıtyn qazaqstandyq oqýshylar men olardyń jobalary:
- Kerimbaı Saıan (Shymkent, №8 gımnazııa, 9-synyp) – jasandy ıntellekt arqyly mıkrobtyq otyn elementterin modeldeý jáne ońtaılandyrý jobasy (Bıologııa).
- Bolysbaı Nurkeldi jáne Basharov Aslan (Taldyqorǵan, «Bilim-ınnovatsııa» lıtseıi, 10-synyp) – «KazLib» bilim berý platformasy (Informatıka).
- Artyqbaı Arnur (Taraz, Zııatkerlik mektep, 11-synyp) – mashınalyq oqytý negizinde qaterli isikterdi avtomatty túrde anyqtaý júıesi (Informatıka).
- Isakov Mıhaıl jáne Nurmuhanbetov Rahım (Almaty, №54 mektep-lıtseı, 10-synyp) – balalarǵa arnalǵan «Neuralese» neırojúıe konstrýktory (Informatıka).
- Ótetileý Altynaı (Túrkistan, Zııatkerlik mektep, 11-synyp) – atmosferalyq derekterdi jınaıtyn «AtmosNano» nanospýtnıgi (Jer jáne ǵarysh týraly ǵylym).
Bıylǵy basty jańalyq – Memleket basshysy Qasym-Jomart Toqaevtyń tapsyrmasy aıasynda Regeneron ISEF jeńimpazdaryna alǵash ret «Bolashaq» halyqaralyq stıpendııasynyń «Bakalavrıat» baǵdarlamasy boıynsha sheteldiń úzdik joǵary oqý oryndarynda tegin bilim alý quqyǵy beriledi. Saıası reformalardyń zańnamalyq bekitilýi daryndy jastardy qoldaýdyń jańa deńgeıin kórsetip otyr.
Sonymen qatar halyqaralyq ǵylymı baıqaýda úzdik shyqqan oqýshylarǵa birjolǵy memlekettik aqshalaı syıaqy tólenedi. Altyn medal ıegerleri 1 500 AEK-ke deıin, kúmis medal alǵandar 1 000 AEK, al qola júldegerler 500 AEK kóleminde syıaqy alady. Oqýshylardy baıqaýǵa baptaǵan pedagogter de nazardan tys qalmaı, olarǵa 26,5 bazalyq laýazymdyq aılyq mólsherine deıin syıaqy taǵaıyndaý kózdelgen.
Aıta keteıik, Regeneron ISEF – álemdegi mektep ǵylymynyń jetekshi alańy. Baıqaýdy halyqaralyq uıymdar men iri tehnologııalyq kompanııalar qoldaıdy, sondaı-aq ol jahandyq ǵylymı-zertteý jarystarynyń úlgisi retinde tanylady. Qazaqstan Respýblıkasy 1999 jyldan beri bul baıqaýdyń ulttyq seriktesi retinde turaqty qatysyp keledi. Bıyl qatysý kvotasy keńeıip, jobalar sany 3-ten 5-ke deıin ulǵaıtyldy.
Buǵan deıin Bakýde «Study in Kazakhstan» halyqaralyq bilim berý kórmesi ótkenin habarlaǵanbyz.
