AQSh-taǵy radıoaktıvti asshaıandar keri qaıtaryldy

ASTANA. KAZINFORM – «Azyq-túlik jáne dári-dármek capasyn qadaǵalaý basqarmasy» (FDA) tsezıı-137 (Cs-137) lastanǵan bolýy múmkin asshaıandardy qaıtaryp alý naýqanyn keńeıtip otyr, dep habarlaıdy Fox Business. 

Shamamen 26 460 býma kokteıl asshaıandary men «Kroger Mercado» arshylǵan jáne pisirilgen asshaıandarynyń 18 myń býmasy yqtımal radıoaktıvti lastanýǵa baılanysty satylymnan shyǵaryldy.

Kokteıl asshaıandary 27 shtatta, al daıyn asshaıandar 17 shtatta 31 shilde men 16 tamyz aralyǵynda Walmart, Kroger, Baker's, Gerbes, Jay C, Mariano's, Metro Market, Pay Less jáne Pick'n Save dúkenderinde satyldy.

Indonezııada óńdelgen júk konteınerleri men muzdatylǵan asshaıan ónimderiniń lastanǵany týraly AQSh-tyń keden jáne shekara qorǵaý qyzmeti eskertý jasady. FDA Walmart-taǵy asshaıandar partııasyna synaq júrgizý barysynda onyń quramynda Cs-137 jasandy radıoaktıvti materıal bar ekenin anyqtady.

Radıoaktıvti ónim AQSh-tyń tórt portynan anyqtalǵan: Los-Andjeles, Hıýston, Maıamı jáne Savanna.

Búginde aýrýǵa shaldyǵýdyń birde bir jaǵdaıy tirkelgen joq. FDA lastanǵan ónimderi bar tutynýshylarǵa olardy joıýdy nemese aqshany tolyq qaıtarý úshin satyp alǵan jerine qaıtarýdy usyndy.

FDA málimetinshe, Cs-137-men lastanǵan taǵamdy nemese sýdy tipti tómen dozada tutyný adamnyń densaýlyǵyna teris áser etýi múmkin, mysaly, qaterli isik qaýpin arttyrady.

Buǵan deıin Qazaqstan arqyly ótkizbek bolǵan 42,2 tonna taýyq eti Qytaıǵa keri qaıtarylǵanyn jazǵan bolatynbyz.