AQSh-taǵy prezıdent saılaýynda Tramptyń qarsylasy úmitkerlikten bas tartty
Krıs Krıstı saıasat pen qarsylasy Donald Tramptyń minezin synaýǵa negizdelgen naýqannan qoldaý taba almady. Kazinform bul týraly Golos Amerıkı basylymyna silteme jasap habarlaıdy.
Nıý-Djersıdiń burynǵy gýbernatory Krıs Krıstı sársenbi kúni 2024 jylǵy saılaýǵa Respýblıkalyq partııa atynan talasýdy toqtatady. Krıstı mundaı sheshimdi saıasat pen talas kóshbasshysy Donald Tramptyń minezin synaýǵa baǵyttalǵan naýqannan qoldaý tappaǵannan keıin qabyldady.
Krıstı – Tramptyń burynǵy odaqtasy. Qazir synaýshyǵa aınalǵan ol burynǵy prezıdentpen ózin teń kóretin jalǵyz respýblıkashyl retinde tanystyrdy.
Maýsymda naýqan bastalǵannan keıin Krıstı kabeldik jańalyqtar shoýyna jıi qatysyp, Trampty bul qyzmetke laıyq emes dep synap, 2021 jylǵy 6 qańtarda Kapıtolııge jasalǵan shabýyldyń moraldyq jaýapkershiligi sonyń moınynda ekenin aıtyp júrdi.
Ol ketse – Tramptyń eń shýly antagonısi jarys jolynan shyqty degen sóz. Dese de, Ońtústik Karolınanyń burynǵy gýbernatory jáne BUU janyndaǵy AQSh-tyń burynǵy turaqty ókili keıingi aılarda Trampqa jıirek synı qarap júr.
Krıstı eks-prezıdenttiń moınyna ilingen tórt qylmystyq isti eskere otyryp, birneshe ret Tramp jalpyhalyqtyq saılaýda demokrat Djo Baıdennen jeńilip qalatynyn boljaǵan.
Krıstı 2016 jyly prezıdent saılaýyna úmitker bolyp, Nıý-Gempshırdegi alǵashqy saılaýdaǵy sátsizdikten keıin naýqanyn aıaqtap, Trampty qoldaǵan alǵashqy iri partııalyq tulǵa boldy. Ol Tramptyń 2020 jylǵy debattarǵa daıyndalýyna kómektesti, biraq burynǵy prezıdenttiń 2020 jyly jeńiske jettim degen jalǵan málimdemesinen keıin ony qoldaýdan bas tartty.
