AQSh-taǵy PPI ósimi jahandyq naryqtaǵy táýekelge qyzyǵýshylyqty báseńdetti

ASTANA. KAZINFORM — Shilde aıynda óndirýshiler baǵalary ındeksi (PPI) aılyq eseppen 0,9%-ǵa ósti, bul 2022 jyldyń maýsymynan bergi eń joǵary aılyq ósim boldy, dep jazdy Qazaqstan qarjygerler qaýymdastyǵy.

Valıýta naryǵy

Beısenbi kúngi valıýta saýda-sattyǵynyń qorytyndysy boıynsha USDKZT juby shamaly qubylmalylyq kórsetip, 1 AQSh dollary úshin 538,1 teńgege deıin (+0,07 teńge) ósti. Saýda kólemi 229,5 mln dollardy qurady (-46,2 mln). Jalpy alǵanda beıtarap syrtqy jaǵdaılardy eskere otyryp, mundaı dınamıka negizinen ishki valıýta naryǵyndaǵy jaǵdaımen anyqtaldy. Teńgege qysym kórsetip otyrǵan ishki faktorlar qatarynda ımport kóleminiń ósýi, belsendi demalys maýsymy, bıýdjet qarajatyn ıgerýdiń jedeldeýi jáne syrtqy qaryzdy óteý/qyzmet kórsetý protsesteri atap ótiledi.

Jarııalanǵan statıstıka ishinde áleýmettik mańyzy bar azyq-túlik taýarlary (ÁMAT) baǵalary ındeksiniń ótken aptada is júzinde ózgerissiz qalǵanyn atap ótken jón: ósim 0,1%-dy qurady.

Búgingi kúnniń basty nazarynda – syrtqy saýda aınalymy, óndiristik ádispen eseptelgen JІÓ jáne aqsha agregattary týraly málimetter jarııalanady.

Aqsha naryǵy

Júıedegi ótimdilik artyqshylyǵynyń ósýi aıasynda aqsha naryǵy kiristiligi ártúrli baǵyttaǵy dınamıkany kórsetýdi jalǵastyrýda. TONIA mólsherlemesi 15,50% deńgeıinde saqtalsa, SWAP-1D kiristiligi 11,32%-dan 11,11%-ǵa deıin tómendedi. Saýda-sattyqtyń jalpy kólemi 664,5 mlrd teńgege deıin ósti (+112,9 mlrd). Sonymen qatar, Ulttyq banktiń depozıttik aýktsıonyna degen suranys 1,4 trln teńgege deıin kóterilip (+188,3 mlrd), tolyǵymen 16,5% jyldyq mólsherleme boıynsha qanaǵattandyryldy. Ulttyq Banktiń operatsııalary boıynsha ashyq pozıtsııa 8,2 trln teńgege deıin ulǵaıdy.

Qor naryǵy

Beısenbi kúni KASE ındeksi 1,2%-ǵa senimdi túrde ósip, tamyz aıynyń basynan bergi rekordtyq deńgeı – 6 830 pýnktke jetti. Indekstiń ósýine eń úlken úlesti BTsK aktsııalary (+5,8%), Halyq Bankiniń qaǵazdary (+1,3%) jáne Qazatomprom (+1,3%) qosty, bul Air Astana aktsııalarynyń tómendeýinen (-1,2%) bolǵan qysymdy teńestirdi. Kúndizgi dınamıka bank sektory men jekelegen shıkizat emıtentteri boıynsha satyp alýshylar belsendiliginiń basym ekenin kórsetip, saýda aınalymynyń artýy aıasynda naryqtyń jalpy ósý úrdisin qoldady.

Munaı

Munaı baǵasy 1,8%-ǵa ósip, barreline 66,8 dollarǵa deıin jetti. Bul ósim AQSh Prezıdenti Donald Tramp pen Reseı Prezıdenti Vladımır Pýtınniń búgingi kezdesýiniń aldynda oryn aldy. Aq úıdiń baspasóz hatshysy Kerolaın Levıtt beısenbi kúni habarlaǵandaı, Alıaskada ótetin kelissózderden keıin taraptar birlesken baspasóz konferentsııasyn ótkizedi. Sarapshylar atap ótkendeı, Ýkraına máselesine qatysty ótetin kezdesý qarsańynda naryq qatysýshylary saqtyq tanytyp otyr. Olar bul kezdesý Reseı shıkizatyna qatysty sanktsııalardyń jumsarýy nemese kerisinshe, satyp alýshylarǵa qarsy shekteýlerdiń kúsheıýine ákeledi dep qaýiptenedi.

Táýekel aktıvter

AQSh-tyń bırjalyq ındeksteri óndirýshiler baǵalary ındeksiniń (PPI) qolaısyz derekteri jarııalanǵannan keıin -0,03% ben +0,03% aralyǵynda shamaly terbelis kórsetti. Bul derekter qyrkúıek aıynda mólsherlemelerdi birneshe ret tómendetý týraly joǵary kútýlerdi salqyndatty. Shilde aıynda óndirýshiler baǵalary ındeksi 0,9%-ǵa ósti, al Dow Jones boljamy 0,2% bolǵan edi. Bul – 2022 jyldyń maýsymynan bergi eń úlken aılyq ósim. Azyq-túlik pen energııa resýrstaryn eseptemegende, bazalyq PPI da 0,9%-ǵa ósti (kútilgeni – 0,3%). Al azyq-túlik, energııa jáne saýda qyzmetterin eseptemeıtin kórsetkish 0,6%-ǵa artty, bul – 2022 jyldyń naýryzynan bergi eń joǵary mán.

PPI ındeksine tutyný baǵalary ındeksine (CPI) qaraǵanda az nazar aýdarylǵanymen, ol óndiristiń aralyq kezeńderindegi baǵa ózgeristeri týraly mańyzdy aqparat beredi. Bul kórsetkishter AQSh Saýda mınıstrliginiń jeke tutyný shyǵyndary ındeksin (PCE) esepteý negizin quraıdy – bul FRJ ınflıatsııany boljaýda basshylyqqa alatyn negizgi ındıkator. Jańartylǵan málimetter osy aıdyń sońynda jarııalanady.

Qorǵaýshy aktıvter

Altyn baǵasy troı ýntsııasyna 3 381 dollarǵa deıin tómendedi (-0,8%), al AQSh-tyń 10 jyldyq qazynashylyq oblıgatsııalarynyń kiristiligi 4,24%-dan 4,29%-ǵa ósti. Dollar ındeksi 98,3 pýnktke deıin tómendedi (+0,4%). Qorǵaýshy aktıvterdiń bul dınamıkasy AQSh-taǵy óndirýshiler ınflıatsııasynyń qyzyp ketken derekterine naryqtardyń reaktsııasyn kórsetedi. Bul derekter FRJ-nyń joǵary mólsherlemelerdi uzaq ýaqyt saqtap qalýy múmkin degen kútýlerdi kúsheıtti.

Al qor bırjasynda dollar baǵamy qaıta qymbattady.