AQSh-taǵy mıgranttardy Kosta-Rıkaǵa deportatsııalaý: Ózbekstan SІM úndeý jasady

TAShKENT. KAZINFORM – Kosta-Rıka úkimeti AQSh-tan deportatsııalanatyn 200 zańsyz mıgrantty qabyldaýǵa daıyn, dep habarlaıdy Kazinform agenttiginiń menshikti tilshisi.

Mıgranttardyń basym kópshiligi – Ortalyq Azııa men Úndistan azamattary. Atalǵan máselege qatysty pikir bildirgen Ózbekstan Syrtqy ister mınıstrliginiń baspasóz hatshysy Ahror Býrhanov barlyq azamatqa tıisti kómek kórsetiletinin málimdedi.

— Biz BAQ arqyly basqa elderge deportatsııalanýy yqtımal Ózbekstan azamattary jaıly aqparattardy baqylap otyramyz. Bul másele boıynsha elimizdiń dıplomatııalyq ókildikteri AQSh tarapynan málimet suratty. Sondaı-aq dıplomattar arqyly Latyn Amerıkasy memleketterimen baılanys ornatyldy. Tıisti jaýaptardy alǵan ýaqytta AQSh-taǵy elshilik qyzmetkerleri barlyq Ózbekstan azamatyna tolyq kómek kórsetedi, - dep málimdedi Ahror Býrhanov.

Ol atap ótkendeı, Ózbekstan men AQSh arasynda tıisti kelisim bar. Oǵan saı deportatsııalaý tártibi jolǵa qoıylǵan. Ahror Býrhanovtyń sózinshe, zańsyz mıgranttar ádette Nıý-Iork — Tashkent marshrýtymen elge oralady. 

Aıta keteıik, AQSh-ta zańsyz júrgen 135 mıgrant mingen ushaq Kosta-Rıkaǵa búgin qonýy múmkin. Resmı San-Hose Ortalyq Azııa elderiniń azamattaryn óz aýmaǵynda 6 aptaǵa deıin ǵana ornalastyrýǵa kelisti.