AQSh-taǵy mal tapshylyǵy sıyr eti baǵasynyń kúrt qymbattaýyna ákeldi
ASTANA. KAZINFORM — AQSh-ta iri qara mal basynyń azaıýyna baılanysty sıyr etiniń baǵasy joǵary deńgeıde qalyp otyr, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.
AQSh-taǵy iri qara mal sany sońǵy 70 jyldan astam ýaqyttaǵy eń tómengi deńgeıge tústi. Buǵan negizgi mal sharýashylyǵy óńirlerindegi qurǵaqshylyq saldarynan jaıylymdardyń qysqarýy, sondaı-aq janarmaı, jumys kúshi men jabdyq qunynyń qymbattaýy sebep bolǵan. Sonyń saldarynan kóptegen fermer malyn satýǵa májbúr boldy.
AQSh-tyń Eńbek statıstıkasy bıýrosynyń málimetinshe, sońǵy bir jylda sıyr eti baǵasy 11,8%-ǵa ósti. Maýsym aıynda ǵana baǵa aldyńǵy aımen salystyrǵanda 1,2%-ǵa qymbattaǵan. Tartylǵan sıyr eti 12,4%-ǵa, rostbıf 13,8%-ǵa, al steık baǵasy 11,4%-ǵa artqan.
Qıyn jaǵdaı týraly Tyson Foods kompanııasy da málimdedi. Kompanııanyń bas dırektory Donnı Kıng sıyr eti óndirisi bólimshesiniń kútken nátıjege jete almaǵanyn aıtty. Onyń sózinshe, bólimsheniń shyǵyny 138 mln AQSh dollar bolyp, satylym kólemi 15,9%-ǵa qysqarǵan. Mal usynysynyń shekteýli bolýy óndiris shyǵyndary men ónim baǵasynyń ósýine áser etken.
Sonymen qatar AQSh Aýyl sharýashylyǵy mınıstrligi (USDA) tamyz aıynyń sońynan bastap Meksıkadan iri qara mal ımportyn kezeń-kezeńimen qaıta bastaıtynyn habarlady. Import bir jyldan astam ýaqyt buryn jańa álem et shybyny taratatyn aýrýdyń órshýine baılanysty toqtatylǵan edi. Jetkizilim Arızona shtaty arqyly, shekaralas Meksıka shtattaryndaǵy epıdemıologııalyq ahýal baǵalanǵannan keıin qaıta jandanady.
Donnı Kıngtiń aıtýynsha, Meksıkamen shekaranyń qaıta ashylýy uzaq merzimde mal jetkizilimin jaqsartýy múmkin. Alaıda bul jaqyn arada qalyptasqan tapshylyq máselesin tolyq sheshpeıdi. Kompanııa jaǵdaıdyń 2027 jyldan bastap birtindep jaqsaratynyna úmit artyp, óndiris tıimdiligin arttyrý jáne shyǵyndardy azaıtý jumystaryn jalǵastyryp jatyr.
Buǵan deıin AQSh-taǵy munaı qory 1983 jyldan bergi eń tómengi deńgeıge deıin azaıǵany habarlanǵan bolatyn.
Aıta ketelik AQSh-tyń ekonomıkalyq ósimi ekinshi toqsanda baıaýlaǵan edi.
