AQSh-taǵy quqyq qorǵaý organdarynyń aqparattyq júıesine taǵy shabýyl jasaldy

ASTANA. KAZINFORM — AQSh Federaldyq tergeý bıýrosy el kólemindegi qylmys týraly derekter bazasynyń buzylýyna baılanysty tergeý bastady. Bul — keıingi birneshe aıdaǵy osyndaı ekinshi oqıǵa. Bul týraly «Sınhýa» jazdy.

FBR AQSh-taǵy qylmys týraly derekter bazasyna jasalǵan ekinshi kıbershabýyldy tergep jatyr
Foto: Kazinform/JI

CNN telearnasynyń málimetinshe, kıbershabýylǵa qatysty tergeý júrip jatqanyn jaǵdaıdan habardar eki derekkóz rastaǵan.

Telearnanyń habarlaýynsha, hakerler keıingi birneshe aıda ekinshi ret Qylmystyq aqparat jónindegi ulttyq ortalyqtyń júıesine engen. Bul derekter bazasy AQSh-tyń federaldyq, aımaqtyq jáne jergilikti quqyq qorǵaý organdary arasynda aqparat almasýǵa múmkindik beredi.

Kıbershabýyl týraly aqparat NBC News telearnasy AQSh Aýyl sharýashylyǵy mınıstrligine jasalǵan shabýyl jóninde habarlaǵannan birneshe saǵat ótken soń jarııalandy.

Telearnanyń dereginshe, osy aptanyń basynda hakerler vedomstvonyń fermerlerge tólem jasaýǵa arnalǵan júıesine qol jetkizgen.

Bul kıbershabýyldar AQSh-ta áýe qatynasy, bank júıesi men ulttyq qaýipsizdik salalarynda birqatar tehnıkalyq aqaý tirkelgen tusta boldy.

Sársenbide AQSh barlaý qyzmetteriniń ókilderi bul aqaýlardyń bir-birine qatysy joq jekelegen oqıǵalar ekenin málimdedi. Olardyń aıtýyna qaraǵanda, máseleler júıelerge tehnıkalyq qyzmet kórsetý jáne ózgerister engizý kezinde týyndaǵan. Sondaı-aq bul úılestirilgen shabýyl nemese qandaı da bir memlekettiń qoldaýymen jasalǵan áreket emes.

Aıta keteıik, tehnıkalyq aqaýlarǵa baılanysty syn kúsheıgen tusta AQSh prezıdenti Donald Tramp beısenbide Aq úıdiń kıberqaýipsizdik basqarmasynyń basshysy Shon Kernkrossty qyzmetinen bosatty. Ol bul laýazymǵa 2025 jylǵy tamyzda taǵaıyndalǵan edi. Tramp basqarmanyń jańa basshysy etip AQSh Qorǵanys mınıstrliginiń aqparattyq tehnologııalar jónindegi dırektory qyzmetin atqarǵan Kırsten Devısti taǵaıyndady.

Eske salaıyq, bıyl tamyzda AQSh-tyń keminde 12 shtatyndaǵy memlekettik sý júıelerine de hakerlik shabýyl jasalǵan. Bul kommýnaldyq ınfraqurylym qaýipsizdigindegi olqylyqtarǵa qatysty alańdaýshylyqty kúsheıtti.

Al onyń aldynda AQSh-tyń bilim berý júıesi hakerlik shabýylǵa ushyraǵanyn habarlaǵanbyz. Osydan soń eldegi joǵarǵy jáne orta bilim berý mekemeleri ýaqytsha qyzmetin toqtatýǵa májbúr boldy. Bul sabaq kesteleri men emtıhan ótkizý tártibine kedergi keltirdi.