AQSh-taǵy kezdesýlerden qandaı nátıje shyǵatyny ózimizdiń iskerligimizge baılanysty — Rasýl Rysmambetov

ASTANA. KAZINFORM — Halyqaralyq qatynastar men ekonomıka saıasaty jónindegi táýelsiz sarapshy Erik Batyrhanov Memleket basshysy Qasym-Jomart Toqaevtyń Nıý-Iorktegi sapary aıasyndaǵy kezdesýlerdiń astary týraly paıymyn bólisti.

— Jahan teńselip turǵan zamanda Qazaqstan Batyspen de, Shyǵyspen de ashyq qarym-qatynas ustap qala beretinin ańdatý mańyzdy. Amerıkalyq ınvestorlarmen ótip jatqan kezdesýler ınvestıtsııa men tehnologııa tartý, jańa naryqtarǵa shyǵý strategııasyna saı. Qazir orta derjavalardyń róli artyp kele jatqanyn da eskerýimiz kerek. Qazaqstan osy sanatqa enip otyr. Álemniń jahandyq deńgeıdegi ortalyqtarynyń arasyndaǵy teńgerim engize alatyn osyndaı orta derjavalar. Sondyqtan Nıý-Iorektegi ekonomıkalyq kelissózderdiń strategııalyq turǵyda da, saıası turǵyda da máni zor. Qazaqstannyń halyqaralyq protsesterdegi belsendi oıynshy retindegi ornyn bekemdeı túsedi, — deıdi sarapshy.

Erik Batyrhanov AQSh ekonomıkasy Qazaqstan úshin árkez eń iri ınvestor ekenin eske salady. Buǵan deıin aradaǵy alys-beriste shıkizat eksportynyń úlesi basym bolsa, bul jolǵy kelissózder kólik, bilim salasyna ınvestor tartylatynyn meńzeıdi.

— Bul kelissózder tehnologııalyq transferge jeteleýi múmkin. Jetekshi tájirıbeler men ınnovatsııaǵa, basqarýdyń jańa standarttaryna jol ashatyn múmkindik týyndap otyr. Bul kelissózderdiń ımıdj jaǵynan da tıimdiligi mol. Amerıkanyń alpaýyt kompanııalary Qazaqstanmen áriptestigin nyǵaıtqysy keletinin álemge ańǵartýdyń ózi úlken sıgnal, — deıdi ol.

Al qarjy sarapshysy Rasýl Rysmambetov BUU sammıti aıasyndaǵy sapardy «temirdi qyzǵan kezde soqqan» ýaqtyly qadam retinde baǵalap otyr. Sarapshy bul kezdesýler AQSh pen Qazaqstan basshylarynyń arasyndaǵy baılanysty jandandyratynyn boljaıdy.

AQSh-tyń Qazaqstanmen baılanystyń ekonomıkalyq jaǵyna basymdyq berip, bizge ınvestıtsııa salýǵa nıetti kompanııalaryna qoldaý kórsetýi úlken múmkindikterge bastaý bola alatynyn aıtady. Ásirese Wabtec kompanııasymen aradaǵy lokomotıv satyp alý kelisiminiń aýqymy nazar aýdarýǵa turarlyqtaı.

— Bul Qazaqstan kompanııalarynyń sheteldiktermen jasaǵan eń iri mámlelerdiń biri. Qazaqstan munaımen ǵana shektelmeı logıstıka salasyna sapaly ınvestıtsııa tartyp jatqany qýantady, — deıdi qarjyger.

Rasýl Rysmambetov Chevron basshylyǵymen ótken kezdesýdiń astaryna da úńilip kórdi. 

— Chevron Qazaqstanda munaı sektorynyń biraz bóligin baqylaýda ustap otyr. Munaı óndirisin údetip, qaıta óńdeý kólemin keńeıtý úshin tipti qoldanystaǵy ýaǵdalastyqtardyń shartyn qaıta qaraý da kerek bolýy múmkin. Óıtkeni ishki qajettilik artqan saıyn shıki munaıǵa degen suranys ózimiz de artatynyn anyq, — deıdi sarapshy.

Sondaı-aq, Embraer kompanııasy Qazaqstanda óz ushaqtaryna qyzmet kórsetý ortalyǵyn ashýdyń múmkindikterin qarastyrmaqshy.

— Júk tasymalynda áýe jolynyń múmkindikterin paıdalanýǵa basymdyq berilip jatyr. Endi osynyń bárin aıaǵyna deıin jetkizip, ýáde etilgen nátıjelerge qol jetkizý úshin tynymsyz ári tyńǵylyqty jumys isteý kerek. Ol úshin elshiliktegiler men otandyq kompanııalar dıplomatııalyq baılanysqa kúsh salýy qajet. AQSh álemniń barlyq eli úshin jahandyq kórshi bolyp esepteledi. Sondyqtan bul elmen baılanys árqashan mańyzdy, — deıdi qarjy sarapshysy.

Esik salsaq, Prezıdent AQSh sapary aıasynda 20-dan astam kezdesý ótkizgen edi. Sonyń ishinde Chevron, Wabtec kompanııalarynyń basshylyǵy da bar.