AQSh-taǵy qarly daýyl saldarynan keminde 30 adam qaza tapty
ASTANA. KAZINFORM — AQSh-taǵy daýyldyń saldarynan el kóleminde kólik qatynasy buzylyp, áýe reısteri toqtap jáne elektr qýaty óship qaldy. Arktıkalyq aýa legi tómen temperatýralardyń saqtalýyna yqpal etip otyr, dep habarlaıdy Euronews.
Qalyń qar jaýyp, aıaz kúsheıdi. Qaharly qys AQSh aýmaǵynan keter emes. Meteorologtar qar men muz basqan óńirlerde arktıkalyq aýanyń jańa tolqyny temperatýrany odan ári tómen deńgeıde ustap turatynyn eskertti.
Pıttsbýrg qalasynyń soltústigindegi aýdandarda 50 santımetrge deıin qar jaýǵan, al jeldiń áserin eseptegendegi temperatýra mınýs 31 gradýs Tselsııge deıin tómendedi.
Meteorologtardyń málimetinshe, aldaǵy demalys kúnderi shyǵys jaǵalaýǵa taǵy bir daýyl soǵýy múmkin.
Qolaısyz aýa raıy shamamen 200 mıllıon amerıkalyqqa áser etti. Tabıǵı apat saldarynan keminde 30 adam qaza tapty. Júzdegen myń adam áli de elektr qýatynsyz otyr. Bılik ókilderiniń aıtýynsha, elektrmen jabdyqtaýdy qalpyna keltirý birneshe kúnge sozylady.
Daýyldyń saldary eń kóp tıgen shtattar — Tennessı, Lýızıana, Tehas jáne Mıssısıpı.
— Qazirgi ýaqytta el boıynsha 750 myń úı elektr qýatynsyz qalyp otyr. Onyń besten birinen astamy, ıaǵnı 20 paıyzdan kóbi — osy Mıssısıpıde. Bir kezde elektrsiz qalǵan úıler sany 180 myńǵa jetken edi. Qazir bul kórsetkish 150 myńǵa deıin azaıdy, — dedi Mıssısıpı shtatynyń gýbernatory Teıt Rıvz.
Arkanzastan Jańa Anglııaǵa deıingi aýmaqta jaýǵan qalyń qar kólik júıesiniń jappaı isten shyǵýyna jáne mektepterdiń jabylýyna sebep boldy.
Sońǵy úsh kúnde ishki jáne halyqaralyq baǵyttar boıynsha shamamen 16 myń áýe reısi toqtatyldy. Myńdaǵan reıs keshiktirildi. Áýe qatynasyndaǵy bul irkilis aýqymy jaǵynan COVID-19 pandemııasynan bergi eń irisi boldy.
Aıta ketelik AQSh-taǵy qarly boran áýe reısterin keshiktirip, myńdaǵan úıdi jaryqsyz qaldyrdy.
