AQSh-taǵy qarly boran áýe reısterin keshiktirip, myńdaǵan úıdi jaryqsyz qaldyrdy

ASTANA. KAZINFORM — AQSh-tyń edáýir bóligin qamtyǵan qysqy daýyl saldarynan birneshe adam qaza taýyp, qolaısyz aýa raıyna baılanysty myńdaǵan áýe reısi toqtatylyp, keıbiri keshiktirildi, dep habarlaıdy VVS.

Ótken demalys kúnderi Tehas shtatynan bastap Men shtatynyń eń ońtústik shetine deıingi aýmaqty qamtyǵan daýyl jaǵdaıdy tym qıyndatyp, avtojoldardaǵy qozǵalysty turalatyp, elektr energııasynyń úzilýine sebep boldy jáne iri qalalardy qalyń qar basty.

AQSh-tyń birneshe shtatynda keminde on shaqty adam kóz jumdy. Ulttyq meteorologııalyq qyzmettiń (NWS) málimetinshe, eldiń soltústik-shyǵysyndaǵy keıbir óńirlerde sońǵy 24 saǵat ishinde 50,8 santımetrden astam qar jaýǵan. Al Kanada bıligi daýyl Ontarıo provıntsııasynyń ońtústik bóligindegi tirshilikti aıtarlyqtaı buzǵanyn habarlady.

Sınoptıkterdiń eskertýinshe, aldaǵy demalys kúnderi AQSh-tyń shyǵys bóliginde taǵy bir «kúshti qysqy daýyl» soǵýy múmkin.

Dúısenbi kúni túske qaraı Tennessı shtatynda 200 myńnan astam adam elektr jaryǵynan ajyrady. Qalada qatty aıaz ornap, turǵyndar sýyq pen qarańǵylyqta qaldy.

«Joldardy kóptegen qulaǵan aǵashtar men elektr jelileri jaýyp tastady», — dep habarlady BBC-ge Nashville Rescue Mission panasyzdarǵa arnalǵan baspanasynyń vıtse-prezıdenti Djoı Flores.

Onyń aıtýynsha, ortalyqqa elektr jaryǵynsyz qalǵan turǵyndardan qońyraýlar kelip túsken.

Dúısenbi kúni amerıkalyq áýe kompanııalarynyń jolaýshylary reısterdiń keshigýine baılanysty narazylyq bildirýin jalǵastyrdy. FlightAware derekterine sáıkes, sol kúni áýe kompanııalarynda 19 myńnan astam reıs keshiktirilip, 5 900 reıs múlde toqtatylǵan.

Jaǵdaıdyń jaqyn arada jaqsaratyn túri joq. Ulttyq meteorologııalyq qyzmettiń málimetinshe, juma kúni bastalýy múmkin taǵy bir qysqy daýyldyń «yqtımaldyǵy artyp keledi». Bul qubylys AQSh-tyń shyǵys bóligin qatty aıazben qysyp, quıǵyta soqqan qarly boran ákelýi múmkin.

AQSh-tyń meteorologııalyq agenttigi sınoptıkterdiń daýyldyń naqty qozǵalý baǵytyn jáne onyń qaı óńirlerge eń qatty áser etetinin ázirge bilmeıtinin eskertti.

Aıta keteıik, AQSh-ta qarly boran saldarynan ekonomıkalyq shyǵyn 100 mlrd dollardan asýy múmkin ekeni boljandy.