AQSh-taǵy «Helen» daýylynan 40-tan astam adam mert boldy

ASTANA. KAZINFORM – Daýyl aldymen Florıdaǵa jetip, keıin soltústikke qaraı – Djordjııa, sondaı-aq Soltústik jáne Ońtústik Karolınaǵa jyljydy, dep habarlaıdy BBC.  

AQSh-tyń ońtústik-shyǵysyn sharpyǵan «Helen» daýyly saldarynan keminde 43 adam qaza taýyp, mıllıondaǵan adam jaryqsyz qaldy.

Meteorologtar jel ekpini, qatty jańbyr men tornado qaýpi seıilmegenin eskertedi. Daýyl aımaǵyndaǵy úıler men joldardy jartylaı sý basqan.

«Helen» daýyly – qýattylyǵy boıynsha ekinshi orynda turǵan, jel jyldamdyǵy saǵatyna 240 shaqyrymǵa jetetin 4-shi sanattaǵy daýyl. AQSh-tyń Daýyldardy baqylaý Ulttyq ortalyǵynyń málimetinshe, «Helen» 24 saǵat ishinde basylýy tıis, biraq qatty jel, sý tasqyny jáne kóshkin qaýpi saqtalady.

«Helen» Qurama Shtattarda daýyl qýattylyǵy reıtınginde 14-shi orynǵa ıe boldy. Bul rette onyń eni 675 km-ge jetedi jáne bul tarıhtaǵy úshinshi kórsetkish – odan aýqymdy bolǵan alapat daýyldar 2017 jyly soqqan «Ida» jáne 1996 jyly soqqan «Opal».

Florıdada jumadan beri kem degende segiz adam qaıtys boldy. Djordjııa gýbernatory Braıan Kemptiń habarlaýynsha, shtatta daýyl saldarynan kem degende 15 adam, onyń ishinde bir qutqarýshy qaza tapqan. Kemp qutqarý jumystaryna Ulttyq gvardııanyń 1000 múshesin jumyldyrýdy buıyrdy. Gýbernatordyń aıtýynsha, shtatta 150-den astam jol jabyq, 1300 baǵdarsham isten shyqqan, keıbir ǵımarattarda adamdar qalyp qoıǵan.

CBS News málimetinshe, Ońtústik Karolınada kem degende 17 adam qaza boldy. Soltústik Karolınada eki adam jáne Vırdjınııada bir adam qaza tapqany týraly habarlandy.

BAQ-tardyń jazýynsha, Tennessı shtatyna qarasty Ervın qalasynda 58 patsıent pen qyzmetkerler aýrýhananyń shatyryna shyqty, aýa raıynyń qolaısyzdyǵyna baılanysty olardy bastapqyda qaıyqtarmen nemese tikushaqtarmen evakýatsııalaý múmkin bolmady. Keıin adamdardy polıtsııa men Ulttyq gvardııanyń tikushaqtary ǵımarat tóbesinen alyp ketti.

Saqtandyrý kompanııalary «Helen» keltirgen shyǵyndy mıllıardtaǵan dollarǵa baǵalady.