AQSh-taǵy derekter ortalyqtary tutas bir elge jetetin elektr energııasyn tutynady

ASTANA. KAZINFORM — 2024-2025 jyldary AQSh-taǵy eń iri derekter ortalyqtary 82 teravatt-saǵat elektr energııasyn tutynǵan. Bul eldiń jalpy energııa tutynýynyń 1,8 paıyzyn quraıdy. Mundaı kórsetkish Mıssýrı shtatynyń nemese Danııa sııaqty tutas bir eldiń bir jyldyq elektr energııasyn tutyný kólemimen shamalas, dep habarlaıdy CBS News agenttigi. 

AQSh-taǵy derekter ortalyqtary tutas bir elge jetetin elektr energııasyn tutynady
Foto: Abalone Technology Group

Nature Sustainability jýrnalynda jarııalanǵan Garvard ýnıversıteti ǵalymdarynyń zertteýi jasandy ıntellektiniń derekter ortalyqtaryna táýeldiligin jáne olardyń qorshaǵan ortaǵa áserin aıqyndaıdy. Ǵalymdar bul ortalyqtardyń nelikten orasan kóp elektr energııasyn tutynatynyn túsindirdi.

— Siz jibergen árbir elektrondy hat, jarııalaǵan árbir fotosýretińiz, kórgen árbir baǵdarlamańyz jáne generatıvti JI-ge joldaǵan árbir suraǵyńyz derekter ortalyqtary arqyly ótedi. Terezesiz ǵımarattarda táýlik boıy jumys isteıtin ondaǵan myń kompıýter ornalasqan. Olar jumys istegende kóp jylý bólinedi. Sondyqtan mundaı ortalyqtardy úzdiksiz salqyndatyp otyrý kerek. Bul – bir sát te toqtamaıtyn zaýyt ispetti, – dedi Garvard ýnıversıtetiniń ǵalymy Djanlýka Gýıdı.

Onyń aıtýynsha, sońǵy jyldary AQSh-taǵy iri derekter ortalyqtarynyń sany eki eseden astam ósken. Taǵy 2 myńǵa jýyq nysannyń qurylysy josparlanyp jatyr nemese qazir salynyp jatyr.

Osyǵan baılanysty Gýıdı tehnologııalyq kompanııalar men bılik ókilderin jańa derekter ortalyqtaryn salý kezinde ashyqtyqty qamtamasyz etýge shaqyrdy. Sondaı-aq ol qurylys bastalmaı turyp nysandardyń qorshaǵan ortaǵa áserin baǵalap, jergilikti turǵyndardyń pikirin eskerýdiń mańyzyn atap ótti.

— Biz jasandy ıntellektini qysqa merzimde damyta alatynymyzdy dáleldedik. Endi ony durys damyta alatynymyzdy da kórseteıik, – dedi ol.

Buǵan deıin Qazaqstanda qýaty 1 GVt derekter ortalyqtary alqaby salynatyny habarlanǵan bolatyn.