AQSh-taǵy aralyq saılaýdan keıin Tramptyń jaqtasy qyzmetinen ketti
ASTANA. KAZINFORM — Konservatıvtik kózqarastaǵy advokat, Donald Tramptyń burynnan bergi jaqtasy Harmıt Dıllon AQSh Ádilet mınıstrligi Azamattyq quqyqtar basqarmasynyń basshysy qyzmetinen ketti, dep habarlaıdy Kazinform agenttiginiń menshikti tilshisi ABC News-ke silteme jasap.
Bul jóninde Bas prokýror Todd Blansh málimdep, Dıllonǵa 18 aı boıy atqarǵan qyzmeti men adaldyǵy úshin alǵys aıtty.
Dıllon — aralyq saılaýdan keıin Tramp ákimshiliginen ketken prezıdenttiń joǵary laýazymdy alǵashqy jaqtasy. Keıbir derekterge qaraǵanda, onyń qyzmetten ketetini aldyn ala belgili bolǵan. Buǵan Dıllon jaýapty bolǵan birqatar sot isterindegi jeńilisterge prezıdenttiń kóńili tolmaýy sebep bolǵan.
Sondaı-aq Dıllon Trampqa onyń ákimshiliginde qyzmet etýge múmkindik bergeni úshin alǵys aıtty. Onyń sózinshe, ózi basqarǵan vedomstvo qoǵamdaǵy teńdik pen ınklıýzııany ilgeriletýge baǵyttalǵan birqatar bastamanyń kúshin joıýǵa qol jetkizgen. Sondaı-aq áıelder sportyn qorǵaý baǵytynda jumys istegen.
Dıllon basqarǵan kezeńde basqarma bedeldi ýnıversıtetterdiń qyzmetine qatysty tergeý júrgizip, saılaýshylar tizimine qol jetkizý máselesi boıynsha sot isterine qatysty.
Budan bólek Dıllon qyzmet atqarǵan kezeńde vedomstvodan júzdegen tájirıbeli zańger ketti. Kongreske usynylǵan málimetterge sáıkes, osy jyldyń basynda basqarma qyzmetkerleriniń shamamen 75 paıyzy jumystan shyqqan.
Dıllon bul qyzmetke taǵaıyndalǵanǵa deıin Tramptyń jeke advokaty boldy. Ol 2020 jylǵy prezıdent saılaýynyń qorytyndysyna daý aıtý áreketterine qatysyp, 6 qańtardaǵy oqıǵalarǵa baılanysty sot protsesterinde Tramptyń múddesin qorǵaǵan.
Násildik kemsitýshilikke qarsy ulttyq qaýymdastyqtyń bas zań keńesshisi, Baıden ákimshiligi kezinde azamattyq quqyqtar jónindegi bas prokýrordyń kómekshisi bolǵan Krısten Klark:
— Ol barlyq amerıkalyqtyń azamattyq quqyqtaryn qorǵaýdyń ornyna, isterdi jaýyp, qyzmetkerlerdi jumystan shyǵaryp, basqarmany zańsyz ári partııalyq maqsattarǵa jetý quralyna aınaldyrdy, — degen bolatyn.
Buǵan deıin AQSh Memlekettik hatshysy Marko Rýbıo qyzmetinen ketetini týraly qaýesetti joqqa shyǵarǵanyn jazǵan edik.
