AQSh-taǵy aralyq saılaýdan keıin Tramp pen Kımniń kezdesýi múmkin – sarapshy

ASTANA. KAZINFORM – AQSh-ta ótken aptadaǵy aralyq saılaýdan keıin prezıdent Donald Tramp pen Soltústik Koreıa basshysy Kım Chen Ynnyń taǵy bir sammıt ótkizý yqtımaldyǵy artýy múmkin, dep habarlaıdy Yonhap.

AQSh-taǵy aralyq saılaýdan keıin Tramp pen Kımniń kezdesýi múmkin – sarapshy
Foto: yna.co.kr

AQSh-taǵy respýblıkalyqtardyń saılaýda jeńilisinen keıin Phenıan Trampty saıası turǵydan álsiregen ári kelissóz júrgizýge qolaılyraq tulǵa retinde qarastyrýy yqtımal. Mundaı pikirdi dúısenbide amerıkalyq sarapshy bildirdi.

– Aralyq saılaýdan keıin eki kóshbasshynyń kezdesý yqtımaldyǵy artady dep oılaımyn, – dedi Strategııalyq jáne halyqaralyq zertteýler ortalyǵynyń (CSIS) Koreıa máseleleri jónindegi sarapshysy Vıktor Cha Tramptyń aldaǵy Azııa saparynyń kún tártibine arnalǵan baspasóz máslıhatynda.

Prezıdenttiń sapary aıasynda Manılada ótetin Ońtústik-Shyǵys Azııa memleketteri qaýymdastyǵynyń (ASEAN) sammıtine jáne Qytaıdyń Shenchjen qalasyndaǵy Azııa-Tynyq muhıty ekonomıkalyq yntymaqtastyǵy (ATES) forýmyna qatysý josparlanǵan.

Sarapshynyń paıymdaýynsha, Phenıan Tramppen qaıta kezdesýdi qarastyrmas buryn aralyq saılaýdyń aıaqtalýyn kútken bolýy múmkin. Óıtkeni Soltústik Koreıa basshylyǵy AQSh prezıdentiniń saıası pozıtsııasy álsireıdi dep boljaǵan.

– Olar Trampty álsizdeý, demek, osal ári kelissóz júrgizýge qolaıly nysana retinde qabyldaýy múmkin, – dedi Cha.

Onyń aıtýynsha, Tramptyń dıplomatııalyq mura qaldyrýǵa degen umtylysy da Soltústik Koreıamen qarym-qatynasty qaıta jandandyrý múmkindigin arttyrady.

– Menińshe, prezıdent kóptegen máselege nazar aýdarady. Sonyń biri – óziniń saıası murasyn qalyptastyrý, – dedi sarapshy.

Cha Soltústik Koreıanyń Vashıngtonmen baılanysty saqtaýǵa múddeli bolýy múmkin ekenin de atap ótti. Bul AQSh-tyń Iran men Venesýelaǵa qatysty boljap bilý qıyn áreketteriniń aldyn alýǵa múmkindik beredi.

Tramp Kım Chen Ynmen qaıta kezdesýge birneshe ret qyzyǵýshylyq bildirgen. Ol eki kóshbasshy arasyndaǵy jeke qarym-qatynasty «jaqsy» dep sıpattaǵan. Osyǵan baılanysty AQSh prezıdentiniń osy aıda Qytaıǵa josparlanǵan sapary kezinde olardyń kezdesýi múmkin degen boljamdar paıda boldy.

Tramptyń alǵashqy prezıdenttik merziminde eki kóshbasshy úsh ret júzbe-júz kezdesken. Alǵashqy kezdesý 2018 jylǵy maýsymda Sıngapýrda, ekinshisi 2019 jylǵy aqpanda Hanoıda ótti. Úshinshi kezdesý Koreıaaralyq shekaradaǵy Phanmýndjom aýylynda uıymdastyryldy.

Eske sala ketsek, buǵan deıin Kım Chen Ynnyń Soltústik Koreıa flotyn kúsheıtýge kiriskenin jazdyq.

Al AQSh Federaldyq tergeý bıýrosy Soltústik Koreıany 6 mlrd dollardan astam krıptovalıýta urlady dep aıyptady.