AQSh-ta zýmerler eń baqytsyz urpaqqa aınalyp barady — zertteý
ASTANA. KAZINFORM — AQSh-ta 18-29 jas aralyǵyndaǵy jastardyń tek 44%-y ǵana ómirine kóńili tolatynyn aıtqan. Gallup zertteýiniń jańa derekterine sáıkes, 2010 jyldan beri bul kórsetkish 20 paıyzdyq tarmaqqa tómendegen.
2020 jyly COVID-19 pandemııasy kezinde ómirine kóńili tolatyn jastardyń úlesi 39%-ǵa deıin tómendedi. 2023 jyly bul kórsetkish qaıta ósip, 51%-ǵa jetti. Alaıda sodan keıin qaıta quldyraı bastaǵan.
Bul úrdis ózge jas toptaryna da áser etken. 2026 jyly 30-44 jastaǵy amerıkalyqtardyń 45%-y ómirine kóńili tolatynyn aıtqan. Bul 2016 jáne 2017 jyldary tirkelgen 62%-dan edáýir az.
45-64 jas aralyǵyndaǵy azamattar arasynda da kórsetkish tómendep, 46%-ǵa jetti. Bul — 2008 jyldan beri osy jas tobynda tirkelgen eń tómengi deńgeı.
Al 65 jastan asqan amerıkalyqtardyń ómirine kóńili tolatyn úlesi artyp keledi. 2026 jyly bul kórsetkish 53%-ǵa jetti. Salystyrý úshin, 2008 jyly ol 38% bolǵan. Osylaısha, 2021 jylǵy rekordtyq deńgeı qaıta tirkeldi.
Jastardyń kóńil kúıine ne áser etedi?
Gallup sarapshylarynyń pikirinshe, amerıkalyq jastardyń ómirine kóńili tolmaýyna depressııanyń keń taralýy, jaqyn adamdarmen baılanystyń álsireýi, kúndelikti ómirdegi jaǵymdy emotsııalardyń azaıýy jáne ózin paıdaly seziný deńgeıiniń tómendeýi áser etip otyr.
2019 jyldan beri kún saıyn jaǵymdy emotsııalardy aıqyn sezinetin jastardyń úlesi azaıǵan. Sonymen qatar ómirine qanaǵattaný deńgeıi men bolashaqqa degen senim de tómendegen.
Zertteýshiler jastardyń jeke maqsattaryna jetýde qıyndyqtarǵa tap bolýyn jáne bolashaqqa degen yntasynyń azaıýyn da osy úrdiske áser etetin faktorlar qataryna qosqan.
Ekonomıkalyq turaqsyzdyq ta jastardyń alańdaýshylyǵyn kúsheıtip otyr. Jas amerıkalyqtar baspananyń qymbattyǵynan úı satyp alýdy qıyn sanaıdy, jumysqa ornalasý múmkindikterine de senimsizdikpen qaraıdy. Buǵan qosa, jasandy ıntellekt jumys oryndaryn tartyp alýy múmkin dep qaýiptenedi.
Áleýmettik qamsyzdandyrý tólemderi men Medicare medıtsınalyq saqtandyrý júıesiniń bolashaǵyna qatysty alańdaýshylyq ta erteńgi kúnge degen senimdi álsiretip otyr.
Jalǵyzdyq pen saıası jáne qoǵamdyq ınstıtýttarǵa degen senimniń tómendeýi de jaǵdaıdy kúrdelendire túsken. Gallup derekterine sáıkes, 18-34 jas aralyǵyndaǵy amerıkalyqtardyń nebári 14%-y óz eli úshin erekshe maqtanysh sezinetinin aıtqan. Bir jyldyń ishinde bul kórsetkish 10 paıyzdyq tarmaqqa tómendegen.
Nelikten egde jastaǵy amerıkalyqtar ómirine kóbirek kóńili tolady?
65 jastan asqan amerıkalyqtardyń ómirine kóńili tolýynyń bir sebebi – qarjylyq turaqtylyq.
Osy jas tobyndaǵy saýalnamaǵa qatysqandardyń 59%-y ózine qajettiniń bárin alýǵa qarajaty jetetinin aıtqan. Al 67%-y saýalnamaǵa deıingi aptada aqshaǵa qatysty alańdamaǵanyn jetkizgen.
Azyq-túlik tapshylyǵyna tap bolǵandar da azaıǵan. Respondentterdiń nebári 6%-y keıingi bir jylda keminde bir ret azyq-túlik jetispeýshiligin bastan ótkergenin aıtqan.
Zertteýshiler densaýlyqqa qatysty keıbir kórsetkishterdiń de jaqsarǵanyn atap ótti. Jeti jyl burynǵy derektermen salystyrǵanda, egde jastaǵy amerıkalyqtar qan qysymynyń joǵarylaýy men dıabetke sırek shaǵymdanady. Sondaı-aq olar tis dárigerine jıirek qaralatyn bolǵan. Zertteýshiler bul faktorlardy ómir sapasyna beriletin joǵary baǵamen baılanystyrady.
2026 jylǵy zertteý aqpan, mamyr jáne tamyz aılarynda júrgizilgen úsh onlaın saýalnamanyń nátıjesine negizdelgen. Saýalnamaǵa AQSh-ta turatyn 15 156 kámeletke tolǵan azamat qatysqan.
Gallup zertteýinde qazirgi ómirin 10 baldyq shkala boıynsha keminde 7 balǵa, al bes jyldan keıingi ómirin keminde 8 balǵa baǵalaǵan respondentter ál-aýqaty joǵary adamdar qataryna jatqyzylǵan.
Eske salaıyq, munyń aldynda zýmerler eńbek naryǵyn qalaı ózgertip jatqanyn jazǵan edik.
