Kókshetaýda zeınetkerlerdiń 7,7 mıllıon teńgesin jymqyrǵan kúdikti qolǵa tústi

KÓKShETAÝ. KAZINFORM — Nemerelerin aman alyp qalýǵa bel býǵan oblys ortalyǵyndaǵy eki zeınetker alaıaqtyń qurbany boldy.

Aqmola oblystyq polıtsııa departamenti baspasóz qyzmetiniń habarlaýynsha, belgisiz bireýler Kókshetaý qalasynda eki zeınetkerge telefon soǵyp, nemereleriniń jol-kólik oqıǵasyn jasaǵanyn habarlaǵan.

— Alaıaqtar jábirlenýshilerdi aldap, úreılendirgeni sonshalyq, zeınetkerler sońǵy jınaǵan aqshasyn berýge esh oılanbastan kelisim bergen. Qarttardyń úıine belgisiz bireý kelip, qolma-qol aqsha salynǵan sómkelerdi alyp ketken. Birinshi jaǵdaıda — 4 100 000 teńge, ekinshisinde — 3 600 000 teńge. Artynsha kúdikti alǵan qarajatty droperlerdiń banktik shottaryna aýdaryp, óziniń jumysy úshin de aqsha alǵan, — delingen departamenttiń aqparatynda.

CiberPol qyzmetkerleri tergeý operatsııasy kezinde kúdiktiniń kim ekenin anyqtady. 20 jastaǵy qyz Telegram qosymshasy arqyly osy jumysty tapqany belgili boldy. Ol óz is-áreketiniń saldary týraly oılamaǵan.

- Qazir qyzdyń eki alaıaqtyq faktisine qatysy bar ekeni dáleldendi. Sotqa deıingi tergeý amaldary júrgizilip jatyr, — dep qosty departamenttegiler.

Aıta keteıik, polıtsııa alaıaqtyqtyń jańa túri týraly eskertti.