AQSh-ta jolaýshy ushaǵyn urlaǵan jumysshynyń kim ekeni anyqtaldy
CIETL. QazAqparat - Jolaýshylar ushaǵyn Sıetl áýejaıynan Horizon Air áýe kompanııasynyń jumysshysy, Vashıngton turǵyny Rıchard Rassel urlaǵan, dep habarlaıdy TASS Associated Press-ke silteme jasap.
Biraq resmı túrde bul týraly áli jarııalanǵan joq. AP taratqan málimetke qaraǵanda, Alıaska shtatyndaǵy Ýasıll qalasynda týǵan Rassel keıinirek Samnerge (Vashıngton shtaty) qonys aýdarǵan. Rasseldiń áleýmettik jelidegi paraqshalaryndaǵy aqparatqa sensek, ol 2012 jyly úılengen.
Jelige jarııalaǵan vıdeolarynyń birinde Rassel óziniń jumysy týraly, onda kóptegen chemodandardy tasymaldaıtynyn aıtqan. Buǵan deıin bılik ókilderi ushaq urysynyń Horizon Air-diń ushaqtardy tirkep, súıreıtin jáne júk tasymaldaıtyn jumysshylary quramynan ekenin aıtqan.
Eske sala keteıik, AQSh-tyń Vashıngton shtatynda áýe kompanııasynyń 29 jastaǵy jumysshysy Sıetl áýejaıynan Horizon Air-ǵa tıesili Q400 jolaýshylar ushaǵyn urlap ketip, laıner Pıýdjet shyǵanaǵyna baryp qulaǵan bolatyn.
Quqyq qorǵaý organdarynyń málimdeýinshe, bul oqıǵanyń terrorıstik aktilerge qatysy joq, jumysshy ózine ózi qol jumsaý maqsatynda osyndaı qadamǵa barǵan. Ushaqta jolaýshylar bolmaǵan, áýejaıda da eshkim zardap shekpegen. Ushaq áýege kóterile bergen tusta ony AQSh áskerı áýe kúshteriniń joıǵysh ushaqtary qadaǵalap otyrǵan.
Horizon Air áýe kompanııasy quramyna kiretin Alaska Air Group holdınginiń bas dırektory Bred Tılden jumysshynyń barlyq qaýipsizdik tekseristerinen ótkenin, ushaq urlanǵan aımaqqa kirýge zańdy quqyǵy bolǵanyn málimdedi. Degenmen, ushaqty basqarýǵa onyń lıtsenzııasy bolmaǵan.
