AQSh-ta jolaýshylardy rýlsiz robotaksı tasymaldaıdy
ASTANA. KAZINFORM – Amazon kompanııasynyń Zoox bólimshesi AQSh-ta jańa rýldik dóńgelegi joq robotaksıdi shekteýli kommertsııalyq maqsatta engizýge maquldaý aldy, dep habarlaıdy NBC News.
Zoox Tasjolda qozǵalys qaýipsizdigi Ulttyq basqarmasynyń (NHTSA) sheshimi kompanııaǵa aldaǵy eki jylda 2500 kólikke deıin kommertsııalyq paıdalanýǵa, sondaı-aq aldymen Las-Vegasta, sodan keıin túrli aımaqtarda shtat talaptary oryndalǵan jaǵdaıda jol aqysyn jınaýǵa federaldy ruqsat beretinin málimdedi.
Zoox qazirgi ýaqytta synaq baǵdarlamasy aıasynda Las-Vegas pen San-Frantsıskonyń keıbir aýdandarynda jolaýshylardy tasymaldaıdy. NHTSA Zoox kompanııasyna apattar men ruqsatsyz kólik toqtatý sııaqty máseleler boıynsha qosymsha esep berý talaptaryn usynyp otyr. Retteýshi organ talaptardy kólikterdiń jumysyna baılanysty túzetedi.
Júrgizýshi adamdy baqylaýdy talap etetin federaldy erejelerden bosatý – kádimgi kólikterdi qaýipsizdik erejelerine sáıkestendirýdiń ornyna robotaksıdi nólden bastap damytatyn kompanııalar úshin mańyzdy jetistik.
Elektr kóligi eki qatar oryndyqqa ıe jáne eń joǵary jyldamdyǵy saǵatyna 75 mıl bolatyn Zoox kompanııasymen qatar Tesla jáne Alphabet kompanııasynyń Waymo sııaqty basqa kompanııalar AQSh-ta ózdiginen júretin taksı qyzmetterin keńeıtýge tyrysyp otyr.
NHTSA Tramp ákimshiliginiń sońyna deıin avtomattandyrylǵan júrgizý júıelerine arnalǵan alǵashqy federaldy qaýipsizdik standarttaryn ázirleýdi josparlap otyr. Vedomstvo sonymen qatar tejegish pedaldary men artqy kórinis aınasyn paıdalanýdy talap etý sııaqty júrgizýshiler qajettiligin eskerý úshin keıbir qoldanystaǵy erejelerdi qaıta qaraýdy usyndy.
