AQSh-ta jolaýshylar ushaǵy órtendi

ASTANA. KAZINFORM – AQSh-tyń Denver qalasyndaǵy halyqaralyq áýejaıda bortynda 179 adamy bar jolaýshylar ushaǵy órtendi, dep habarlaıdy KAZINFORM New York Post basylymyna silteme jasap.

Aldyn ala málimet boıynsha, Maıamı baǵytyna bet alǵan ushaq ushý jolaǵynan kóteriler sátte shassıdiń aqaýyna baılanysty toqtap qalǵan. Órttiń shyǵýyna dál osy aqaý sebep bolýy múmkin.

Oqıǵa saldarynan keminde bir adam zardap shekti.

Jolaýshylar shuǵyl túrde tótenshe jaǵdaıǵa arnalǵan syrǵanaý traptary arqyly evakýatsııalandy.

Áýejaı ákimshiligi oqıǵaǵa baılanysty 100-ge jýyq reıstiń keshiktirilgenin málimdedi.

Oqıǵanyń naqty sebebin anyqtaý maqsatynda AQSh-tyń Federaldy azamattyq avıatsııa basqarmasy tergeý jumystaryn júrgizip jatyr.

Aıta keteıik, Italııada shaǵyn ushaq trassaǵa qulap, eki adam qaza tapqan.