AQSh-ta jolaýshylar avtobýsy alty kólikpen soqtyǵysyp, bes adam qaza tapty

Bul týraly Vırdjınııa shtatynyń polıtsııasy málimdedi.

Jol apaty jergilikti ýaqyt boıynsha saǵat 02:35 shamasynda bolǵan.

Aldyn ala málimetke sáıkes, jol jóndeý jumystaryna baılanysty tasjoldyń ońtústik baǵytyndaǵy qozǵalys baıaýlaǵan.

Alaıda avtobýs júrgizýshisi jyldamdyǵyn der kezinde tómendete almaı, alty jeńil kólikpen soqtyǵysqan.

Vırdjınııa shtaty polıtsııasynyń ókili Mett Demleınniń aıtýynsha, kóz jumǵan bes adamnyń barlyǵy jeńil kólikterde bolǵan.

Tórt adam, onyń ishinde eki bala, bir kólikte otyrǵan.

Taǵy bir adam basqa avtokólikte mert bolǵan.

Qurban bolǵandardyń jasy 7 men 45 aralyǵynda.

Oqıǵa ornyna órt sóndirý jáne qutqarý qyzmetteri jiberildi.

Qutqarý jumystaryna 13 jedel járdem brıgadasy, qutqarý tehnıkasy jáne AQSh jaıaý áskeriniń Kýantıko bazasyndaǵy tótenshe jaǵdaı qyzmetkerleri tartyldy.

Stafford okrýgi órt sóndirýshiler kásipodaǵynyń málimetinshe, qutqarýshylar kóptegen búlingen kólikterdi, zardap shekkenderdi jáne órtenip jatqan birneshe avtokólikti kórgen.

— Stafford okrýginiń eki qutqarý toby kólikterde qysylyp qalǵan adamdardy shyǵarý boıynsha aýqymdy operatsııa júrgizdi. Osy ýaqytta órt sóndirýshiler jalyndy aýyzdyqtap, oqıǵa ornyndaǵy qaýipsizdikti qamtamasyz etti, — delingen kásipodaq habarlamasynda.

Jol apaty saldarynan jalpy sany 44 adam jaraqat alǵan.

Olardyń úsheýi aýyr jaǵdaıda aýrýhanaǵa jetkizildi.

E&P Travel kompanııasyna tıesili avtobýs New York City qalasynan Charlotte qalasyna baǵyt alǵan.

Avtobýs ishinde 34 jolaýshy bolǵan.

Avtobýsty basqarǵan 48 jastaǵy Tszın S. Dong te jaraqat alǵan.

Tergeýshiler júrgizýshiniń apat aldyndaǵy áreketterin tekserip jatyr.

Polıtsııa ókilderiniń aıtýynsha, oǵan aıyp taǵý máselesi ázirge sheshilgen joq.

Eske salsaq, buǵan deıin Almatyda ál-Farabı dańǵylyndaǵy rezonans týdyrǵan jol apatyna qatysty sot protsesi bastalǵany habarlanǵan edi.