AQSh-ta jas ana 3 jasar ulyn óltirý úshin kıller jaldady
MAIAMI. QazAqparat – Osy aptada Maıamı polıtsııasy 3 jasar ulyn óltirý úshin kıller jaldamaq bolǵan 18 jastaǵy boıjetkendi qamaýǵa aldy, dep habarlaıdy QazAqparat CNN-ge silteme jasap.
Djasmın Paez ózi bilmeı kisi óltirýmen aınalysatyn adamdardy anyqtaýǵa arnalǵan jalǵan veb-saıtta óz balasyn óltirýge tapsyrys berý úlgisin toltyrdy.
Polıtsııanyń aıtýynsha, veb-saıt operatory óltirý týraly ótinishti ala sala dereý polıtsııaǵa habarlaǵan.
Tergeýden keıin bılik seısenbi kúni keshke Paezdi qamaýǵa aldy. Sot qujattaryna sáıkes, 18 jastaǵy qyzǵa birinshi dárejeli kisi óltirýge arandatý aıyby taǵylǵan.
Óz balasyn óltirýge tapsyrys úlgisin toltyrǵan kezde, Paez jalǵan esimdi qoldanyp, balasyn múmkindiginshe tezirek alyp ketýdi jáne óltirýdi surady.
Bılik Paezdi jalǵan veb-saıt arqyly alynǵan IP mekenjaıy men telefon nómirin paıdalanyp tapty.
Anyqtalǵan, úı 3 jasar balanyń ájesiniń úıi bolyp shyqqan. Polıtsııanyń málimetinshe, bala sol kezde ájesimen birge turǵan.
Ájesi saıtta kórsetilgen fotosýrettegi týǵan nemeresi ekenin, al telefon nómiri – qyzynyki ekenin rastady.
Paez anasynyń úıinen mamyr aıynda ketip qalǵan, biraq kún saıyn ulymen telefon arqyly sóılesetin.
Paezdi qamaýǵa alar aldynda onyń isimen aınalysqan detektıvterdiń biri saıtta kórsetilgen nómir boıynsha baılanys ornatyp, kıller retinde onymen habarlama almasty.
Paez bastapqy tapsyrysty rastap, «jumys» úshin 3000 dollar tóleýge kelisti, dep habarlady polıtsııa.
Jas qyzdyń týǵan ulyn óltirýge nelikten oqtalǵanyn túsindirdi. Aıtýynsha, ózi kezdesip júrgen er adam onyń balasynyń bar ekenin bilgende tastap ketken.
Paez kisi óltirýshini jaldap, balasynan qutylý arqyly súıiktisimen qaıta qosylýǵa úmittengen.
