AQSh-ta zańsyz júrgen ózbek azamaty B.Obamaǵa qastandyq jasaýdy josparlaǵan
ASTANA. 11 aqpan. QazAqparat - AQSh-ta zańsyz júrgen Ózbekstan azamaty, 22 jastaǵy Ulyqbek Qodırov AQSh prezıdenti Barak Obamaǵa qastandyq jasaýdy josparlaǵanyn moıyndady, dep habarlady Bı-Bı-sı.
Sotta U.Qodırovqa AQSh prezıdentine qastandyq jasamaq bolǵany, zańsyz qarý ıelengeni jáne lańkestermen yntymaqtastyqta bolǵany týraly aıyp taǵyldy.
Endi ol sot sheshimine baılanysty 30 jylǵa deıin túrmede otyrýy múmkin.
Aıyptaýǵa sáıkes U.Qodırov AQSh-qa stýdenttik vızamen kelgen, biraq oqýǵa kirispegen. AQSh-ta ol «Ámir» degen laqap aty bar lańkestik uıym serkeleriniń birimen baılanysta bolǵan. Onyń tikeleı basshylyǵymen U.Qodırov «ıslam úshin qajetti» AQSh prezıdentin óltirýdi josparlaı bastaǵan.
U.Qodırovtiń kompıýterinen ekstremıstik materıaldar, al onyń ınternet-braýzeriniń tarıhynan radıkaldyq ıslam saıttaryna kirgeni anyqtalǵan. 2011 jylǵy shildede U.Qodırov Federaldyq barlaý bıýrosynyń qarapaıym kıingen agentinen atys qarýyn satyp alý áreketi ústinde tutqyndaldy.
U.Qodırovqa úkim osy jylǵy 17 mamyrda shyǵarylmaq.
