AQSh-ta zańsyz júrgen Qazaqstan azamattarynyń sany belgili - Ermuhambet Qonyspaev

ASTANA. KAZINFORM – QR Syrtqy ister mınıstriniń orynbasary Ermuhambet Qonyspaev AQSh-ta zańsyz júrgen Qazaqstan azamattaryna qatysty pikir aıtty.

Onyń aıtýynsha, AQSh shekarasynda zańsyz mıgranttardy qonystandyratyn lagerlerde Qazaqstan azamattary joq.

- Vashıngtondaǵy Qazaqstan elshiligi jáne basqa da konsýldyq mekemeler AQSh-taǵy azamattarǵa qatysty turaqty esep júrgizip turady. Jaqynda bizdiń elshilik AQSh-tyń kóshi-qon saıasaty boıynsha málimdeme jasady. ıAǵnı, atalǵan elde zańsyz júrgen adamdarǵa tıisti shara qoldanylmaq. Dál qazir zańsyz júrgen adamdardyń naqty sanyn aıta almaımyn. Biraq olardyń barlyǵyna eskertý joldandy. Shamamen qansha adam zańsyz júrgeni týraly aqparat bizde bar. Syrtqy ister mınıstrligine saýal joldasańyzdar, olardyń sanyna qatysty naqty málimet beremiz, - dedi E. Qonyspaev Parlament Májilisinde tilshiler suraǵyna jaýap bere otyryp.

Eske salsaq, byltyr AQSh-ta deportatsııaǵa jatatyn mıgranttardyń arasynda 369 qazaqstandyq týraly aqparat taraǵan. 

Taıaýda AQSh-taǵy mıgratsııalyq saıasattyń qatańdatylýyna baılanysty Qazaqstan elshiligi shetelde qujatsyz, vızasyz júrgen qazaqstandyqtarǵa eskertý jasady.

QR Syrtqy ister mınıstrligi Qazaqstan azamattary AQSh-tan emin-erkin shyǵa alatynyn málimdedi.