AQSh-ta zańdy negizi joq mıgranttarǵa elden ketý qajettigi eskertildi

ASTANA. KAZINFORM — AQSh prezıdenti Donald Tramptyń ákimshiligi Kýba, Gaıtı, Nıkaragýa jáne Venesýeladan kelgen jarty mıllıonnan astam mıgrantty ýaqytsha quqyqtyq mártebesinen aıyratyndaryn málimdedi, dep habarlaıdy VVS.

AQSh-ta zańdy negizi joq mıgranttarǵa 24 sáýirge deıin elden ketý qajettigi eskertildi, sebebi sol kúnnen bastap olardyń jumys isteýge ruqsattary men deportatsııadan qorǵaný mártebeleri joıylady.

2022 jyly prezıdent Djo Baıdenniń ákimshiligi CHNV baǵdarlamasyn iske qosyp, amerıkalyq demeýshileri bar mıgranttarǵa jáne olardyń jaqyn týystaryna AQSh-qa kelip, eki jylǵa deıin ýaqytsha ımmıgratsııalyq mártebemen qalýǵa ruqsat berdi. Ákimshilik bul bastama AQSh-tyń ońtústigindegi shekarany zańsyz kesip ótýdi azaıtady dep málimdegen.

Osy baǵdarlama aıasynda AQSh-qa 530 myń mıgrant keldi. Olardyń qanshasy elde zańdy túrde qalýǵa múmkindik beretin basqa quqyqtyq mártebe alǵany belgisiz.

Donald Tramp prezıdenttik qyzmetine kirisken boıda baǵdarlamany toqtatty.

Juma kúni AQSh-tyń Іshki qaýipsizdik mınıstrligi aldyńǵy ákimshilikti mıgranttarǵa jumys oryndary úshin básekelestik jasaýǵa múmkindik berip, amerıkalyq jumysshylardyń múddesin shektedi dep aıyptady.

AQSh-tyń Federaldyq tiziliminde jarııalanǵan habarlamada CHNV baǵdarlamasymen elde júrgen keıbir mıgranttarǵa jeke jaǵdaılarǵa baılanysty elde qalýǵa ruqsat berilýi múmkin ekeni aıtylǵan.

Aıta ketelik 2024 jyl mıgranttar ólimi jóninen rekord ornaǵan jyl boldy.